Britaniya universitetlaridan o’g’irlangan millionlab hujjatlar sotuvga qo’yildi.

O’g’irlangan fayllar Eron veb-saytlarida 2 funt sterlingga sotilmoqda.

Britaniyaning The Telegraph gazetasining xabar berishicha, eronlik kiberjinoyatchilar Buyuk Britaniya universitetlaridan, jumladan, Oksford va Kembrijdan millionlab hujjatlarni, jumladan, yadro energiyasi va kiberxavfsizlik bo’yicha maxfiy tadqiqotlarni o’g’irlashgan.

O’g’irlangan materiallar Eron veb-saytlarida 2 funt sterlingga sotuvga qo’yilgan. Fayllarni sotib olish uchun foydalanuvchilar WhatsApp yoki Telegram orqali so’rov yuborishlari kerak edi. Keyin xaridor pulni hujumchilarning bank hisob raqamiga o’tkazishi kerak edi va ular hujjatlarni yuborishardi.

Edinburg universitetining IT xavfsizligi bo’limi boshlig’i Alistair Fenemorning so’zlariga ko’ra, u ham kiberjinoyatchilar qurboni bo’lgan, hujumchilar universitet xodimlari va talabalarining ma’lumotlarini olish uchun soxta veb-saytlardan foydalanganlar. Fenemorning aytishicha, universitet hozirda kompyuter xavfsizligi tizimini almashtirmoqda.

Kembrij universiteti vakili nashrga ta’lim muassasasi muammodan xabardor ekanligini va kiberxavfsizlik tizimini doimiy ravishda yangilab borayotganini aytdi.

Joriy yilning iyul oyida Eron kiberjinoyatchi guruhlari AQSh va Yevropa davlatlari infratuzilmasi, jumladan, elektr tarmoqlari, gidroelektr stansiyalari, sog‘liqni saqlash tashkilotlari va texnologiya korxonalariga keng ko‘lamli hujumlar uchun poydevor tayyorlayotgani ma’lum bo‘ldi.