Cryptopia kriptovalyuta birjasi shubhali xakerlik hujumi tufayli faoliyatini to’xtatdi.
Hodisa natijasida yetkazilgan zarar miqdori noma’lum.
Yangi Zelandiyada joylashgan Cryptopia kriptovalyuta birjasi «katta yo’qotishlarga» olib kelgan «kiberxavfsizlik hodisasi» tufayli o’z veb-sayti va xizmatlarini yopdi. Cryptopia veb-sayti hozirda oflayn rejimda.
Birjaning Twitterdagi postiga ko’ra, voqea 14-yanvar, dushanba kuni sodir bo’lgan. Cryptopia ma’muriyati zararni baholash uchun barcha xizmatlarni darhol yopdi.
Yangi Zelandiya politsiyasining ma’lumotlariga ko’ra, huquqni muhofaza qilish organlari birjada ruxsatsiz bitimlar haqida xabardor qilingan. Hozirda hodisa yuzasidan tergov olib borilmoqda.
Whale Security ma’lumotlariga ko’ra, dam olish kunlari bir qator noodatiy tranzaksiyalar aniqlangan. Ulardan birida noma’lum shaxslar Cryptopia birjasidan taxminan 1,2 million dollarlik 48 029 306 ta Centrality (CENNZ) tokenlarini noma’lum manzilga o’tkazishga urinishgan. Noma’lum shaxslar shuningdek, 2,4 million dollarlik 19 391 ta Ethereum (ETH) ni o’tkazishga urinishgan. Hozirda bu tranzaksiyalar gumon qilingan xakerlik hujumi bilan bog’liqmi yoki yo’qmi noma’lum.
Cryptopia — Yangi Zelandiyada joylashgan mashhur kriptovalyuta birjasi. 2018-yil yanvar holatiga ko’ra, birjada 1,4 milliondan ortiq mijozlar bor edi.
