Europol «Rex Mundi» xakerlar guruhini zararsizlantirdi.

Guruh korporativ tarmoqlarga noqonuniy kirib, maʼlumotlarni o‘g‘irlagan va ularni oshkor qilmaslik evaziga to‘lov talab qilgan.

Joriy yilning may oyida Tailand Qirollik politsiyasi Fransiya rasmiylari tomonidan berilgan xalqaro order asosida 25 yoshli xakerni hibsga oldi. Ushbu hibsga olish Europol hamda Kiberjinoyatlarga qarshi kurash bo‘yicha qo‘shma tezkor guruh (J-CAT) ko‘magida bir yil avval boshlangan xalqaro operatsiya doirasidagi sakkizinchi holat bo‘ldi. 2017-yilning may oyida Britaniya kompaniyasi kiberhujumga uchradi va buning oqibatida mijozlarga oid katta hajmdagi maʼlumotlar o‘g‘irlandi. «Rex Mundi» (lotin tilidan tarjima qilganda «Dunyo qiroli» degan maʼnoni anglatadi) guruhi ushbu hodisa uchun javobgarlikni darhol o‘z zimmasiga oldi.

Hujumdan bir necha kun o‘tgach, o‘zini «Rex Mundi» a’zosi deb tanishtirgan fransuz tilida so‘zlashuvchi shaxs kompaniya bilan telefon orqali bog‘landi. O‘z so‘zlarini tasdiqlash maqsadida u o‘g‘irlangan mijozlar ma’lumotlarining katta qismini kompaniyaga yubordi. U ma’lumotlarni oshkor qilmaslik evaziga Bitcoin ko‘rinishida 580 000 yevro miqdorida to‘lov talab qildi. Shuningdek, u hujum vaqtida foydalanilgan zaiflikni ochib berish hamda uni bartaraf etish bo‘yicha maslahat berish evaziga qo‘shimcha 825 000 yevro talab qildi. To‘lov amalga oshirilmagan har bir kun uchun talab qilinayotgan summa yana 210 000 yevroga oshib borishi belgilandi.

Britaniya va Fransiya rasmiylaridan ishga oid materiallarni qabul qilib olgach, Yevropol maxsus operatsiya boshladi. Huquqni muhofaza qilish organlari xodimlari bir soat ichida tovlamachining shaxsini aniqlashga muvaffaq bo‘ldilar; u Fransiya fuqarosi bo‘lib chiqdi.

2017-yilning iyun oyidan buyon Fransiya rasmiylari «Rex Mundi» guruhining besh nafar a’zosini hibsga oldi. Asosiy gumonlanuvchi tovlamachilik bilan shug‘ullanganini tan olgan, biroq kiberhujumni amalga oshirish uchun «darknet»da o‘z xizmatlarini taklif qiluvchi xakerlarni yollagan. 2017-yilning oktabr oyida Fransiyada yana ikki kishi, o‘tgan yilning may oyida esa Tailandda sakkizinchi shaxs hibsga olindi.

«Rex Mundi» guruhi 2012-yildan buyon faoliyat yuritib kelmoqda. Uning a’zolari doimiy bir xil usulda ish tutishgan: ular korporativ tarmoqlarga buzib kirib, ma’lumotlarni o‘g‘irlashgan, so‘ngra jabrlanuvchilar bilan bog‘lanib, ma’lumotlarning maxfiyligini saqlash evaziga to‘lov talab qilishgan. Bundan tashqari, jinoyatchilar o‘zlari foydalangan zaiflikni oshkor qilish uchun alohida haq talab qilishgan.