Facebook foydalanuvchi ma’lumotlariga maxsus kirish huquqini taqdim etdi.

Facebook bir guruh kompaniyalar bilan ularga foydalanuvchilar ma’lumotlaridan foydalanish bo‘yicha maxsus imkoniyat taqdim etishni nazarda tutuvchi kelishuvlar tuzdi.

The Wall Street Journal nashrining xabar berishicha, xabardor manbalarga tayanib, Facebook 2015-yildan keyin ham bir qator kompaniyalarga foydalanuvchilar ma’lumotlarini taqdim etishda davom etgan va shu tariqa ushbu amaliyotni to‘xtatgani haqidagi o‘z bayonotlariga zid harakat qilgan.

Gazeta ma’lumotlariga ko‘ra, Facebook foydalanuvchilar ma’lumotlaridan foydalanish bo‘yicha maxsus imkoniyat berilgan «tanlangan kompaniyalar guruhi» bilan kelishuvlar imzolagan. Bu holat jurnalistlar tomonidan ko‘rib chiqilgan sud hujjatlari bilan ham tasdiqlanadi.

Taʼkidlanganidek, bunday kelishuvlar mavjudligi haqidagi maʼlumotlar avvalroq oshkor qilinmagan edi. Facebook tomonidan «oq ro‘yxatlar» deb atalgan ushbu kelishuvlarning ayrimlari Royal Bank of Canada va Nissan Motor kabi muayyan kompaniyalarga foydalanuvchilarning qo‘shimcha maʼlumotlaridan foydalanish imkoniyatini bergan. Bu maʼlumotlar foydalanuvchilar va ularning do‘stlarining telefon raqamlari, shuningdek, ular o‘rtasidagi o‘zaro muloqotlarning yaqinlik darajasini kuzatish imkonini beruvchi statistik ko‘rsatkichlarni o‘z ichiga olgan.

Hisobotga ko‘ra, ushbu kelishuvlarning aksariyati Facebook tomonidan kamida 60 ta elektron qurilma ishlab chiqaruvchi kompaniya bilan tuzilgan bitimlardan farq qiladi.

Facebook vakillarining ta’kidlashicha, kompaniya foydalanuvchilar tajribasini yaxshilash va yangi funksiyalarni sinovdan o‘tkazish maqsadida dasturchilar bilan cheklangan miqdorda kelishuvlar tuzgan. Ushbu kelishuvlarning aksariyati bir necha hafta yoki oy davomida amal qilgan. Nashrning qayd etishicha, Facebook qancha kompaniya bilan hamkorlik qilgani yoki kelishuvlarning muddati qancha bo‘lgani hozircha noma’lum.

Eslatib o‘tish joizki, joriy yilning may oyi oxirida ijtimoiy tarmoqdagi texnik nosozlik tufayli 14 million Facebook foydalanuvchisining shaxsiy postlari ommaga oshkor bo‘lib qolgan edi.