Firibgarlar Google Xaritalar orqali spam yuborishmoqda.

Foydalanuvchilar sovg’a evaziga joylashuv ma’lumotlarini so’rab bildirishnomalar olishadi.

Firibgarlar spam yuborishning yangi usulini topdilar – Google Xaritalar ilovasi orqali. Reddit forumida Android va iOS qurilmalari egalaridan Xaritalardagi push-bildirishnomalar sovg’a evaziga joylashuv ma’lumotlarini so’rashi haqida shikoyatlar paydo bo’la boshladi. Bildirishnomalar odatda «Siz Google’dan bepul sovg’a oldingiz», «Siz bepul sovg’a oldingiz» va hokazo kabi sarlavhalar bilan bo’ladi. Xabarni bosgandan so’ng, foydalanuvchidan o’z joylashuvini kiritish so’raladi.

«Bu juda g’alati. Men hozirgina Xaritalardan «Siz Google’dan bepul sovrin oldingiz» degan push-bildirishnoma oldim va bu qandaydir Google Play-for-rewards sxemasi deb o’yladim. Biroq, men uni bosganimda, u «Siz bepul sovrin oldingiz» nomli foydalanuvchidan ekan va Xaritalar mening joylashuvimni ular bilan baham ko’rishni taklif qildi. Men bloklash tugmasini topdim va tamom. Boshqa kimdir buni boshdan kechirganmi? Agar ishonchli foydalanuvchi davom etishga qaror qilsa nima bo’ladi?», deb yozgan Reddit foydalanuvchilaridan biri.

Bunday bildirishnomani olgandan so’ng, aksariyat foydalanuvchilar o’z ma’lumotlarini berishdan bosh tortadilar. Biroq, ba’zilari o’zlarining joylashuvlarini berishga rozi bo’lishdi. Bu foydalanuvchilar odatda bildirishnomalar yaqin atrofdagi do’konlar tomonidan reklama maqsadida yuborilayotganiga ishonishdi. Biroq, foydalanuvchi o’z ma’lumotlarini taqdim etganidan keyin hech narsa bo’lmadi.

Hozircha Google Xaritalarda kim va nima uchun spam yuborayotgani noma’lum. Bunday xabarlarni olgan foydalanuvchilarga ularni bloklash tavsiya etiladi.