GCHQning sobiq rahbari Rossiyani kiberhujumlarni real vaqt rejimida sinovdan o‘tkazishda aybladi.

Hannigan bunga misol tariqasida VPNFilter zararli dasturi yordamida amalga oshirilgan hujumlarni keltirib o‘tdi.

Hukumat aloqa markazi (GCHQ)ning sobiq rahbari Robert Hannigan InfoSec Europe kiberxavfsizlik konferensiyasida Rossiya hozirda real nishonlarga qarshi potensial kiberhujum imkoniyatlarini sinovdan o‘tkazayotganini ma’lum qildi. Bu haqda *The Register* xabar berdi.

«Bu xatolikmidi yoki tajriba — noma’lum. Rossiya real nishonlar ustida kiberhujumlarni mashq qilayotganga o‘xshaydi […] biroq biz ushbu doktrinani to‘liq tushunmayapmiz», — deb ta’kidladi agentlikning sobiq rahbari.

Hannigan bunga misol tariqasida butun dunyo bo‘ylab kamida 500 000 ta router va ma’lumot saqlash qurilmasiga ta’sir ko‘rsatgan VPNFilter zararli dasturi bilan bog‘liq hujumlarni keltirib o‘tdi.

Hanniganning so‘zlariga ko‘ra, davlatlar kiberfazoda ham xuddi real dunyodagi kabi harakat qiladilar. Masalan, Shimoliy Koreya mablag‘ o‘g‘irlash maqsadida SWIFT tarmog‘iga ulangan banklar hamda kriptovalyuta birjalarini nishonga oladi. Eron ham moliyaviy muassasalarga qarshi kiberhujumlarga aloqadorlikda ayblangan. Tramp ma’muriyatining Eron yadroviy kelishuvidan chiqishi kiberfazoda keskinlikning kuchayishiga olib kelishi mumkin.