Germaniya energetika tarmoqlariga qilingan hujumlarda «rossiyalik xakerlar» gumon qilinmoqda.

Ayrim xabarlarga ko‘ra, yuzdan ortiq kompaniya tarmoqlarida xakerlik hujumlari izlari aniqlangan.

Germaniyaning Axborot xavfsizligi bo‘yicha federal idorasi (BSI) mamlakat energetika kompaniyalariga qaratilgan kiberhujumlar to‘lqini haqida ogohlantirdi. Tagesschau.de xabariga ko‘ra, idora ushbu hujumlar ortida Rossiya bilan aloqador xakerlar turgan bo‘lishi mumkinligini taxmin qilmoqda. BSI energetika sohasidagi kompaniyalarga qaratilgan keng ko‘lamli hujum haqida ma’lum qildi; xakerlar allaqachon bir qator korxonalar tarmoqlariga kirishga muvaffaq bo‘lishgan. Garchi BSI zarar ko‘rgan kompaniyalarning aniq sonini oshkor qilmagan bo‘lsa-da, ayrim xabarlarda yuzdan ortiq firma tarmoqlarida hujum izlari aniqlangani qayd etilgan.

O‘tgan yozda BSI ayrim kompaniyalarga, xususan, elektr energiyasi yetkazib beruvchi eng yirik kompaniyalardan biri bo‘lgan EnBW’ning sho‘ba korxonasi — NetCom BW’ga qilingan hujumlar haqida ogohlantirgan edi. Biroq hozirda masala butun mamlakat bo‘ylab kompaniyalarga qilinayotgan hujumlarga taalluqlidir.

Agentlik fikricha, xakerlik hujumlari «Berserk Bear» (shuningdek, «Dragonfly» nomi bilan ham ma’lum) va «Sandworm» guruhlari ishi bo‘lishi mumkin. AQSh va Buyuk Britaniya razvedka xizmatlari ma’lumotlariga ko‘ra, har ikkala guruh ham Rossiya bilan aloqador.