Germaniya pochta kompaniyasi o’z mijozlari haqidagi ma’lumotlarni siyosiy partiyalarga sotdi

Germaniya pochta kompaniyasi o’z mijozlari haqidagi ma’lumotlarni siyosiy partiyalarga sotdi

Deutsche Post jinsi, yoshi, oilaviy holati, ma’lumoti va daromadi haqida ma’lumotlarni taqdim etdi.

Bild am Sonntag muxbirlari jurnalistik tekshiruv davomida Germaniyada Deutsche Post pochta kompaniyasi o’z mijozlari haqidagi ma’lumotlarni Germaniya siyosiy partiyalariga sotganini aniqladilar.

Nashr ma’lumotlariga ko’ra, Deutsche Post mijozlarning shaxsiy ma’lumotlarini kamida 2005-yildan beri o’zining sho»ba korxonasi Deutsche Post Direkt GmbH orqali sotib kelmoqda.

2017-yilda ikkita Germaniya partiyasi — Xristian Demokratik Ittifoqi (CDU) va Erkin Demokratik Partiya (FDP) ushbu kompaniyaning saylovchilarni tahlil qilish xizmatlaridan foydalangan. O’z navbatida, Deutsche Post partiyalarga o’z mijozlari haqida jinsi, yoshi, oilaviy holati, ma’lumoti, uy-joyga egalik, avtomobilga egalik va daromad kabi turli xil anonim ma’lumotlarni taqdim etgan.

Eslatib o’tamiz, Facebook ilgari yirik tahlil firmasi Cambridge Analytica sahifasini ijtimoiy tarmoqning maxfiylik siyosatini buzganlikda ayblab bloklagan edi. Xususan, firma saylov natijalarini bashorat qilish va ta’sir ko’rsatishga qodir kuchli dasturiy ta’minot yaratish uchun AQSh saylovchilari haqida ma’lumotlarni to’playotgan edi.