Germaniya rasmiylari kiberhujumga uchradi.

Turla guruhi hujumga aloqadorlikda gumon qilinmoqda.

Germaniya huquqni muhofaza qilish organlari Bundestag a’zolari, Bundesver xodimlari va bir nechta diplomatik vakolatxonalarning kompyuterlariga kiberhujumni aniqladi, deb xabar beradi Der Spiegel. Konstitutsiyani himoya qilish va terrorizmga qarshi kurash federal idorasi (Bundesamt für Verfassungsschutz, BfV) ma’lumotlariga ko’ra, hujumlar Rossiya hukumati bilan hamkorlik qilganlikda gumon qilinayotgan Snake guruhi (Turla va Uroburos nomi bilan ham tanilgan) tomonidan amalga oshirilgan. Nashrning ma’lumotlariga ko’ra, hujumchilar parlament a’zolarining elektron pochta akkauntlarini buzib kirishga uringan. BfV kiberhujum asosan mamlakatning davlat va siyosiy sohalariga ta’sir ko’rsatganini ta’kidladi. Eng so’nggi hujum 14-noyabr kuni qayd etilgan. Hozirda jinoyatchilar biron bir maxfiy ma’lumotni o’g’irlashga muvaffaq bo’lganmi yoki yo’qmi noma’lum.

«Snake» guruhi ilgari Germaniyadagi hukumat tarmoqlariga hujum qilgan. Xususan, 2018-yil bahorida hujumchilar Germaniya Tashqi ishlar vazirligi tarmog’iga kirib ketishgan. Nashrning yozishicha, rasmiylar xakerlik hujumini erta aniqlagan va maxfiy ma’lumotlarni o’g’irlashga urinish paytida zararlangan kompyuterni tarmoqning qolgan qismidan ajratib qo’ygan.

O’tgan kuzda Snake arsenalidan Shveytsariya Mudofaa vazirligi va uning hamkor tashkilotining serverlariga hujum qilayotgan zararli dastur aniqlandi. Mutaxassislar hujumni tezda aniqlab, to’xtata oldilar.