Germaniya razvedkasi Avstriyadagi xalqaro tashkilotlar ortidan josuslik qildi.

BND 75 ta elchixona, shuningdek, OPEC, MAGATE (IAEA), YeXHT (OSCE) va boshqa tashkilotlarni kuzatuv ostiga olgan.

*Profil* nashrining xabar berishicha, Germaniya Federal razvedka xizmati (Bundesnachrichtendienst yoki BND) Avstriya hukumati aloqa tarmoqlari, diplomatik vakolatxonalar hamda Venadagi xalqaro tashkilotlarning bosh qarorgohlarini ommaviy kuzatuv ostiga olgan. Jurnal ma’lumotlariga ko‘ra, razvedka idorasi ushbu kuzatuvni 1999–2006-yillar oralig‘ida «selektorlar» — ya’ni ismlar, statsionar va mobil telefon raqamlari, faks raqamlari hamda elektron pochta manzillarini o‘z ichiga olgan qidiruv mezonlari — yordamida amalga oshirgan. Xususan, Germaniya razvedkasi Avstriya Federal kanslerligi, Tashqi ishlar va Mudofaa vazirliklari, Interpolning Avstriyadagi bo‘limi, Avstriya Iqtisodiyot palatalari hamda bir qator universitetlar va nodavlat tashkilotlarni nishonga olgan.

Josuslik kampaniyasi o‘nlab elchixonalar va xalqaro tashkilotlarni, jumladan, Neft eksport qiluvchi mamlakatlar tashkiloti (OPEC), Yevropada xavfsizlik va hamkorlik tashkiloti (YXHT), Xalqaro atom energiyasi agentligi (MAGATE), BMTning Giyohvand moddalar va jinoyatchilik bo‘yicha boshqarmasi, BMTning Sanoatni rivojlantirish tashkiloti (UNIDO) hamda BMTning Kosmik fazo masalalari bo‘yicha boshqarmasini ham qamrab oldi. Razvedka xizmati, shuningdek, Avstriyada bosh qarorgohi joylashgan kompaniyalarni, jumladan, Avstriya banklari hamda mudofaa va metallurgiya sanoati korxonalarini ham nishonga oldi. Umumiy hisobda BND 2000 ga yaqin nishonni kuzatuv ostiga olgan.

Bundestagning Parlament nazorati qo‘mitasi (PKG) rahbari Armin Shusterning ma’lum qilishicha, qo‘mita Avstriyadagi kuzatuv faoliyati haqidagi xabarlarni, xususan, gap yangi kampaniya haqida ketayotganini yoki bu 2015-yilda fosh bo‘lgan razvedka faoliyatining davomi ekanligini o‘rganib chiqadi. Shusterni ta’kidlashicha, tekshiruvning dastlabki natijalari kelasi hafta oxirida e’lon qilinadi.

O‘z navbatida, Avstriya kansleri Sebastyan Kurs Germaniya rasmiylari Avstriya hududidagi josuslik kampaniyasi davomida to‘plangan bo‘lishi mumkin bo‘lgan barcha ma’lumotlarni o‘chirib tashlashi shartligini ta’kidladi.