Gretsiya sudi xaker Vinnikni Rossiyaga ekstraditsiya qilishga rozi bo’ldi.

Sudning rasmiy qarori 14-sentabr kuni e’lon qilinadi.

Gretsiya Oliy sudi Rossiya Bosh prokuraturasining BTC-e birjasi va yirik miqdordagi kriptovalyuta firibgarligiga aloqadorlikda gumon qilingan «rus xakeri» Aleksandr Vinnikni ekstraditsiya qilish to’g’risidagi iltimosini qondirdi. Bu haqda TASS axborot agentligiga Vinnikning yunon advokati Ilias Spirliadis xabar berdi. «Sudning rasmiy qarori 14-sentabr kuni e’lon qilinadi, ammo sudyaning sud majlisida aytganlaridan ko’rinib turibdiki, Vinnikni Rossiyaga ekstraditsiya qilish to’g’risida qaror qabul qilingan», dedi Spirliadis.

Eslatib o’tamiz, 38 yoshli rossiyalik 2017-yil iyul oyida Gretsiyada hibsga olingan va oktyabr oyida Saloniki sudi uni AQShga ekstraditsiya qilishni buyurgan. AQSh rasmiylariga ko’ra, Vinnik noqonuniy ayirboshlash va pul yuvish uchun ishlatilgan BTC-E kriptovalyuta birjasining asoschilaridan biri.

Ayblanuvchining o’ziga ko’ra, uning hibsga olinishi Amerika razvedka idoralari tomonidan amalga oshirilgan operatsiya bo’lgan. Rossiya rasmiylari ham Vinnikning ekstraditsiyasini so’rab, unga nisbatan yengilroq ayblovlar qo’yishdi. Vinnik Rossiya Bosh prokuraturasiga iqrornoma taqdim etganiga qaramay, Gretsiya dastlab Rossiya agentligining so’rovlarini e’tiborsiz qoldirdi va «rus xakeri»ni Fransiyaga ekstraditsiya qilishga qaror qildi, u yerda u 130 million yevro miqdorida zarar yetkazgan kiberjinoyatda ayblanmoqda.