Hakerlar Yaponiya sindikatidan 10 million dollarlik tokenlarni o‘g‘irlab ketishdi.

Hujumchilar Ethereum, LevelUp, Orbs va Shopin tokenlarini o‘g‘irlashga muvaffaq bo‘lishdi.

Noma’lum xakerlar «Japanese Syndicate»ga tegishli bo‘lgan va «Token Generation Event» (tokenlar chiqarish tadbiri) ishtirokchilarining aktivlarini saqlovchi hamyonga noqonuniy kirishdi. Hujumchilar 10 million dollarlik mablag‘ni o‘g‘irlashga erishdilar. Shopin kompaniyasi tomonidan e’lon qilingan bayonotga ko‘ra, xakerlar Ethereum, LevelUp, Orbs va Shopin tokenlarini o‘g‘irlagan. Shopin ushbu hodisani tekshirish uchun huquqni muhofaza qilish organlariga murojaat qildi.

«Biz ushbu xabardan chuqur qayg‘udamiz va ushbu hujumdan jabr ko‘rgan Shopin hamjamiyatining barcha yaponiyalik a’zolariga hamdardlik bildiramiz. Yaqinda bizga yaponiyalik bir guruh (sindikat) bizning tokenlarimizni himoyasi zaif hamyonda saqlayotgani haqida ma’lum qilindi. Biz ushbu hodisani o‘rganish bo‘yicha barcha zarur choralarni ko‘rdik», — deya bayon qildi Shopin vakillari.

Shopin — foydalanuvchilarga ularning xaridlar tarixi va afzalliklari asosida muayyan veb-saytlar va ilovalarni tavsiya etuvchi xizmat. Savdogarlar esa blokcheyn texnologiyasiga asoslangan xavfsiz va tezkor tranzaksiyalardan foydalanish imkoniyatiga ega bo‘ladilar.