Huawei Facebook foydalanuvchilarining ma’lumotlaridan foydalanish imkoniyatiga ega edi.

Facebook shu hafta oxirigacha Huawei bilan hamkorlikni to‘xtatishini e’lon qildi.

Facebook AQSh milliy xavfsizligiga tahdid deb hisoblanadigan Xitoyning texnologiya ishlab chiqaruvchisi — Huawei kompaniyasi foydalanuvchilar ma’lumotlaridan foydalanish imkoniyatiga ega bo‘lganini tasdiqladi. Facebook vakillarining so‘zlariga ko‘ra, Huawei ushbu ma’lumotlardan ijtimoiy tarmoqning mobil ilovasi o‘z smartfonlarida ishlashini ta’minlash maqsadida foydalangan.

«Facebook boshqa ko‘plab AQSh texnologiya kompaniyalari qatori o‘z xizmatlarini Huawei va boshqa Xitoy ishlab chiqaruvchilarining qurilmalariga integratsiya qilish ustida ishlagan. AQSh Kongressining bu masalaga qiziqishini inobatga olib, biz barcha ma’lumotlar Huawei serverlarida emas, balki bevosita qurilmalarning o‘zida saqlanganiga aniqlik kiritmoqchi bo‘ldik», — deya Facebook vakillarining so‘zlaridan iqtibos keltiradi Reuters.

Kompaniya taʼkidlaganidek, koʻp yillar davomida foydalanuvchilar va ularning doʻstlari haqidagi maʼlumotlardan foydalanish imkoniyatiga ega boʻlgan mobil telefon ishlab chiqaruvchilari tomonidan maxfiylik siyosati buzilishi holatlari qayd etilmagan.

Bugungi kunga qadar Facebook ilovasi ushbu ijtimoiy tarmoqdan smartfonlarda foydalanishni standartlashtirishga xizmat qildi. Amazon, Apple, BlackBerry, HTC, Microsoft va Samsung kabi 60 ga yaqin qurilma ishlab chiqaruvchilari platforma interfeysini o‘z qurilmalariga moslashtirish ustida Facebook bilan hamkorlik qildilar. Shu bilan birga, Facebook vakillari kompaniya shu hafta oxirigacha Huawei bilan hamkorlikni yakunlashini e’lon qildilar.