«Internet otasi» Amazon, Facebook va Google bilan kurashish yo’lini o’ylab topdi.

Tim Berners-Li ma’lumotlarni himoya qilish bo’yicha yangi loyiha tayyorlamoqda.

Butunjahon oʻrgimchak toʻri, URI, URL, HTTP va HTML protokollarini yaratuvchisi Tim Berners-Li internetni markazsizlashtirish, foydalanuvchi maʼlumotlarini himoya qilish va ular ustidan nazoratni qaytarib olishdan iborat Solid deb nomlangan yangi ochiq kodli loyihani taqdim etdi. Platforma Massachusets texnologiya instituti olimlari va boshqa tadqiqotchilar bilan hamkorlikda ishlab chiqilmoqda. Solid mavjud veb-protokollar (HTTP, REST va HTML) asosida qurilgan. Platforma foydalanuvchilarga shaxsiy maʼlumotlar, kontaktlar roʻyxati va boshqa maʼlumotlarni oʻz ichiga olgan oʻz maʼlumotlar omborlarini yaratish imkonini beradi. Bu foydalanuvchilarga uchinchi tomon omborlarini (masalan, Dropbox) olib tashlash va oʻz maʼlumotlarini toʻliq boshqarish, unga kim kirishi mumkinligini hal qilish imkonini beradi.

“Solid foydalanuvchilar xizmatlar evaziga shaxsiy maʼlumotlarini raqamli gigantlarga topshirishga majbur boʻladigan mavjud modelga qarshi chiqadi. Barchamiz tushunganimizdek, bu bizning manfaatlarimizga mos kelmaydi. Solid bilan biz internetni muvozanatni tiklash uchun yaxshilayapmiz, har kimga shaxsiy maʼlumotlarini toʻliq nazorat qilish imkoniyatini beramiz”, deb tushuntirdi olim.

Foydalanuvchilar o’ziga xos virtual pasport (WebID) olishadi va qaysi ilovalarga kirish huquqini o’zlari hal qilishlari mumkin bo’ladi. Hozircha, Solid shunchaki ramka, ammo kelajakda loyiha mualliflari «jismoniy shaxslar, ishlab chiquvchilar va kompaniyalarga innovatsion, ishonchli va foydali ilovalar va xizmatlarni yaratishning yangi usullaridan foydalanish» imkoniyatini berish niyatida.