iPhone chip ishlab chiqaruvchisi WannaCry tufayli 250 million dollar yo’qotadi

TSMC rahbariyati kompaniya tarmoqlarini yuqtirishda WannaCry zararli dasturini ayblamoqda.

Zararli dasturiy ta’minot hujumi Tayvan Semiconductor Manufacturing Company (TSMC) kompaniyasiga 250 million dollarga tushadi — bu uning joriy yilning uchinchi choragidagi umumiy daromadining 3 foizi. SecurityLab avvalroq xabar berganidek, o’tgan juma, 3-avgust kuni iPhone chiplarini ishlab chiqaruvchi TSMC zararli dastur yuqtirgani sababli ishlab chiqarishni to’xtatishga majbur bo’ldi. Zararli dastur bir nechta eskirgan Windows 7 kompyuterlari va ishlab chiqarish uskunalarini nishonga olgan. Yakshanba kuni e’lon qilingan bayonotga ko’ra, mahalliy vaqt bilan soat 14:00 ga qadar kompaniya hodisadan zarar ko’rgan uskunalarning 80 foizini tiklagan.

Bayonotda TSMC tarmoqlariga hujum qilgan aniq zararli dastur ko’rsatilmagan. Biroq, The Register xabar berishicha, kompaniya rahbariyati WannaCry virusini ayblamoqda.

Ushbu zararli dastur o’tgan bahorda butun dunyo bo’ylab tartibsizliklarga sabab bo’ldi. Britaniyalik tadqiqotchi Markus Xatchins uning tarqalishini to’xtatishga muvaffaq bo’ldi. U zararlangan xost unga ulanganda «o’chirish tugmasi» vazifasini bajaradigan domenni ro’yxatdan o’tkazdi.

Biroq, WannaCry hali ham zavodlar kabi yopiq tizimlarda jiddiy muammolarga olib kelishi mumkin, deb tushuntirdi xavfsizlik bo’yicha mutaxassis Kevin Beaumont. «Zavod tarmoqlarida har doim ham internetga ulanish imkoniyati mavjud emas, shuning uchun ular ‘o’chirish tugmasi’ga ulana olmaydi», deb ta’kidladi Beaumont.