iPhone chiplari yetkazib beruvchisi zararli dastur tufayli ishlab chiqarishni to’xtatdi

Ishlab chiqarishning to’xtatilishi yetkazib berishda kechikishlar va qo’shimcha xarajatlarga olib keladi.

iPhone va iPadlar uchun elektron platalar yetkazib beruvchisi va Qualcomm kompaniyasining yirik ishlab chiqarish hamkori bo’lgan Taiwan Semiconductor Manufacturing Company (TSMC) o’z tizimlarida zararli dasturlarni aniqlaganidan so’ng bir nechta chip zavodlarini vaqtincha yopdi. Mashhur chip ishlab chiqaruvchisi ilgari zararli dasturlar hujumiga uchragan bo’lsa-da, bu zararli dasturlar TSMC ishlab chiqarish liniyalariga birinchi marta ta’sir ko’rsatmoqda.

Hodisa tafsilotlari oshkor qilinmayapti. TSMC vakillarining so’zlariga ko’ra, hodisa xakerlarning ishi emas edi.

«Hodisa yangi vosita uchun dasturiy ta’minotni o’rnatish jarayonida xatolik tufayli yuzaga kelgan. Xatolik vosita kompaniyaning kompyuter tarmog’iga ulanganidan keyin zararli dasturlarning tarqalishiga sabab bo’lgan. Ma’lumotlar yaxlitligi va maxfiy ma’lumotlar buzilmagan. TSMC allaqachon zaiflikni tuzatish va xavfsizlik choralarini kuchaytirish uchun choralar ko’rgan», deyiladi kompaniya bayonotida.

Zararli dastur zavod tizimlarini qanday yuqtirgani hozircha noma’lum. Kompaniya zararlangan zavodlar iPhone chiplarini ishlab chiqarishda ishtirok etganmi yoki yo’qmi, aniq aytmadi.

TSMC ishlab chiqarishning to’xtatilishi yetkazib berishda kechikishlar va qo’shimcha xarajatlarga olib kelishini taxmin qilmoqda.