Kiberjinoyatchilar fishing saytlarini davlat xizmatlari sifatida niqobladilar.

O‘rnatilgan skript foydalanuvchining joylashuvini avtomatik ravishda aniqlab, sayt mazmuni va dizaynini o‘zgartirdi.

Group-IB xavfsizlik bo‘yicha tadqiqotchilari brauzer yangilash sahifalari va davlat onlayn xizmatlari ko‘rinishida niqoblangan bir nechta firibgarlik saytlari aniqlangani haqida xabar berishdi. Mutaxassislarning ta’kidlashicha, ular may oyida «browserupd» nomli zararli saytni hamda u bilan bog‘liq yana to‘qqizta saytni aniqlaganlar.

«Tashrif buyuruvchilarga Google Chrome, Safari va Opera kabi brauzerlarning go‘yoki ‘yangilangan’ versiyalaridan foydalanganliklari evaziga 50 dan 3000 dollargacha (3000 dan 200 000 rublgacha) pul va’da qilingan. Brauzerlarini yangilagan dastlabki 10 000 nafar foydalanuvchi uchun jami 1,5 million dollar ajratilgani da’vo qilingan. Biroq, bu pulni ‘ishlab topish’ uchun bir qator shartlarni bajarish talab etilgan va ularning har biri tashrif buyuruvchidan moliyaviy mablag‘ kiritishni talab qilgan. Minimal to‘lov miqdori 350 rublni, maksimali esa 1700 rublni tashkil etgan… Tabiiyki, hech kim hech qanday pul olmagan», — deya xabar berdi tadqiqotchilar.

Jinoyatchilar veb-brauzerlarning vizual uslubi, logotiplari va ranglar gammasiga taqlid qilishgan hamda saytga maxsus skript joylashtirishgan; ushbu skript tashrif buyuruvchining brauzer turini avtomatik aniqlab, olingan ma’lumotlar asosida muayyan kontentni yuklagan. Foydalanuvchilarga avtomatik «yangilanish»dan so‘ng, go‘yoki yutuqni olish uchun «dollarni rublga konvertatsiya qilish va to‘lovni amalga oshirish» kerakligi aytilgan.

Soxta davlat xizmatlari portallari ham shunga o‘xshash tarzda ishlagan. Maxsus dasturiy kod foydalanuvchining joylashuvini avtomatik aniqlab, sayt mazmuni va dizaynini o‘zgartirgan. Jabrlanuvchi saytda bir qator savollarga javob bergach, unga akkaunti faollashtirilmagani ma’lum qilingan. Firibgarlar akkauntni 170 rubl evaziga faollashtirishni taklif qilishgan.

Tadqiqotchilarning maʼlumotlariga koʻra, bir oy davomida taxminan 300 000 foydalanuvchi, jumladan, Rossiya, Ukraina, Belarus va Qozogʻiston fuqarolari firibgarlik saytlariga tashrif buyurgan.