Mac’dagi Quick Look dasturidagi xatolik shifrlangan ma’lumotlarni oshkor qiladi.

Keshlangan fayllar diskning kirish mumkin bo’lgan, himoyalanmagan qismida ochiq matnda saqlanadi.

macOS Quick Look fayllarni oldindan ko’rish ilovasida parol bilan himoyalangan, shifrlangan disklarda saqlangan fayllarning tarkibini ochib beradigan zaiflik aniqlandi. Xavfsizlik bo’yicha tadqiqotchi Voytsex Regula tushuntirganidek, hujjat ochilganda yoki yaratilganda, operatsion tizim uni keshlaydi va nusxasini saqlaydi, keyinchalik u Quick Lookda ochiladi. Muammo shundaki, bu keshlangan fayllar va papkalar shifrlanmagan qattiq diskdagi kirish mumkin bo’lgan joyda ochiq matnda saqlanadi.

Regulaning nazariyasini tasdiqlash uchun u bir xil faylni ikkita diskka yukladi. Ulardan biri VeraCrypt yordamida shifrlangan bo‘lsa, ikkinchisida Apple’ning standart shifrlash usullari qo‘llanilgan edi. So‘ngra u oddiy terminal buyrug‘ini kiritib, barcha kesh fayllari himoyalanmagan holatda saqlanadigan papkaga kirish imkoniga ega bo‘ldi.

Yana bir mutaxassis — Patrik Uordlning taʼkidlashicha, Regula tasvirlagan muammo taxminan sakkiz yildan beri, jumladan, Apple kompaniyasi shu oy boshida taqdim etgan macOS Mojave tizimining joriy versiyasida ham mavjud.

macOS himoyalangan APFS konteynerlari bilan ham shunga o‘xshash tarzda ishlaydi va hatto shifrlangan jildlarni ham ko‘rish imkonini beradi. Uordlning tushuntirishicha, konteyner tizimdan uzilganda (unmount qilinganda), fayllarning kichik tasvirlari (miniatyuralari) vaqtinchalik papkada saqlanib qoladi. Tizimga kirish imkoniga ega bo‘lgan tajovuzkorlar yoki huquqni muhofaza qilish organlari ushbu hujjatlarni ko‘zdan kechirishi mumkin. Mutaxassis, shuningdek, USB-fleshka Mac-ga ulanganida tizim tashqi diskdagi fayllar uchun belgilar (ikonkalar) yaratishi va ularni yuklash diskida saqlab qo‘yishini ta’kidladi.

Apple kompaniyasi yuqorida tilga olingan zaiflikni bartaraf etishni rejalashtirayotgani hozircha noma’lum; shu bois mutaxassislar foydalanuvchilarga konteynerni ajratish (unmount qilish) vaqtida QuickLook keshini qo‘lda o‘chirib tashlashni tavsiya qiladilar.

Quick Look — turli formatdagi hujjatlarni oldindan ko‘zdan kechirishga mo‘ljallangan dastur. Ushbu funksiya ilk bor Mac OS X Leopard tizimida paydo bo‘lgan.