MapleChange kriptovalyuta birjasi kiberhujumdan so’ng barcha mablag’larini yo’qotdi.

Ba’zi foydalanuvchilar birja rahbariyati tomonidan firibgarlik sodir etilganidan shubhalanmoqdalar.

Kanadaning MapleChange kriptovalyuta birjasi barcha mablagʻlarning oʻgʻirlanishiga olib kelgan kiberhujum haqida xabar berdi. Biroq, baʼzi foydalanuvchilar xakerlar aybdor emas deb hisoblashadi. MapleChange’ning Twitter’dagi postiga koʻra, “Zaiflik tufayli baʼzi odamlar birjadan barcha mablagʻlarni olib chiqishga muvaffaq boʻlishdi”. Birja mijozlardan uzr soʻradi va tergov tugaguniga qadar yoʻqotishlarni qoplay olmasligini qoʻshimcha qildi. Qisqa vaqt oʻtgach, postda mablagʻlar butunlay yoʻq boʻlib ketgani, zarar uchun kompensatsiya yoʻqligi va birja yopilayotgani haqida xabar berildi.

MapleChange ijtimoiy tarmoq sahifalari o’sha kuni ertalab server yangilanishi va «hamma uchun 2.0 versiyasi» mavjudligi haqida e’lon qilinganiga qaramay, qisqa vaqtga o’chirib tashlandi. Server yangilanishidan o’n sakkiz soat o’tgach, MapleChange mablag’larning to’liq yo’qolishiga va birjaning yopilishiga olib kelgan xakerlik hujumi haqida xabar berdi.

MapleChange katta platforma emas edi, ammo xakerlik hujumi haqida xabar berilganidan keyin operatsiyalarni butunlay yopish juda kam uchraydigan holat. Natijada, ko’plab foydalanuvchilar birja rahbariyati tomonidan firibgarlik sodir etilganidan shubhalanishdi.

Biroz vaqt o’tgach, MapleChange ijtimoiy tarmoq sahifalari qayta ish boshladi. Birja vakillarining so’zlariga ko’ra, ular yo’qolib ketmagan, balki keyingi qadamlarini ko’rib chiqish uchun akkauntlarini vaqtincha o’chirib qo’yishgan.

«Biz barcha yo’qotishlarni qoplay olmaymiz, lekin odamlar (umid qilamanki) qolgan pullarini yechib olishlari uchun barcha hamyonlarni ochishimiz mumkin», dedi MapleChange bayonotida.