Microsoft o‘z forumlarida Windows 7 va Windows 8 uchun texnik yordam ko‘rsatishni to‘xtatadi.

Windows 7, Windows 8.1, Office 2010, Office 2013 va boshqa dasturiy ta’minotlar foydalanuvchilariga endilikda texnik yordam ko‘rsatilmaydi.

2018-yilning iyul oyidan boshlab Microsoft kompaniya forumlarida foydalanuvchilar tomonidan eski dasturiy ta’minot va apparat vositalari bo‘yicha qoldirilgan savollarga javob yoki yechim taqdim etishni to‘xtatadi. Microsoft xodimlari tomonidan texnik yordam ko‘rsatilishi to‘xtatiladigan dasturiy mahsulotlar qatoriga Windows 7, Windows 8.1, Windows 8.1 RT, Microsoft Security Essentials, Internet Explorer 10, Office 2010 va Office 2013 kiradi.

Kompaniya shuningdek, Zune media-pleeri va Microsoft Band fitnes-trekeriga oid muhokama tarmoqlarini yopadi; endilikda ularni faqat o‘qish mumkin bo‘ladi.

Bundan tashqari, kompaniya endi Surface Pro, Surface Pro 2, Surface RT va Surface 2 planshetlari bo‘yicha savollarga javob bermaydi.

Microsoft shuningdek, «Mobile Devices Forum» muhokama tarmog‘ida ishtirok etishni to‘xtatadi, biroq «Other Windows Mobile Devices» tarmog‘ida yordam ko‘rsatishni davom ettiradi.

Microsoft bayonotiga ko‘ra, faol ko‘rib chiqish, monitoring yoki savollarga javob berish jarayonlari amalga oshirilmaydi. Foydalanuvchilarning xavfsiz va ijobiy muhitda muloqot qilishini ta’minlash maqsadida forumlar Microsoft xodimlari tomonidan moderatsiya qilib boriladi.