Microsoft qaysi zaifliklarni tuzatmasligini ma’lum qildi.

Kompaniya operatsion tizimdagi zaifliklarni bartaraf etish bo‘yicha o‘z majburiyatlarini bayon qildi.

Microsoft kompaniyasi operatsion tizimdagi zaifliklarni bartaraf etishga oid majburiyatlarini batafsil yorituvchi «Windows uchun xavfsizlikni ta’minlash majburiyatlari» (Security Servicing Commitments for Windows) nomli hujjatni e’lon qildi. Xususan, ushbu hujjatda Microsoft dasturchilari qaysi muammolarni hal qilishi va qaysilari bilan shug‘ullanmasligi belgilab berilgan. U kiberxavfsizlik bo‘yicha mutaxassislarga Windows operatsion tizimiga xos xususiyatlar, cheklovlar va jarayonlar haqida aniqroq tasavvur berish, shuningdek, kompaniya zimmasiga olgan xizmat ko‘rsatish majburiyatlariga oydinlik kiritishni maqsad qiladi.

«Biz xizmat ko‘rsatish siyosatimizga oid fikr-mulohazalarni bilishdan manfaatdormiz va tadqiqotchilar sifatida siz mezonlarimizni mantiqiy deb topasiz, deb umid qilamiz», — deyiladi hujjatda.

Microsoft tushuntirganidek, yangi zaiflik aniqlanganda baholashning ikkita mezoni qo‘llaniladi:

– Aniqlangan zaiflik Microsoft himoya qiladigan operatsion tizim funksiyalariga xavf soladimi?

– Zaiflikning jiddiyligi ma’lum bir darajaga yetadimi?

Har ikkala savolga ham ijobiy javob Microsoft dasturchilari ushbu muammo ustida ishlashini hamda barcha qo‘llab-quvvatlanadigan mahsulotlar uchun tuzatishlar imkon qadar tezroq chiqarilishini anglatadi.

Agar savollardan birortasiga ham javob «yo‘q» bo‘lsa, kompaniya zaiflikni bartaraf etishni operatsion tizimning yangi versiyasi chiqarilgunga qadar kechiktiradi. Hujjatda, shuningdek, zaifliklarning xavflilik darajalari — «kritik», «yuqori», «o‘rtacha», «past» va «nol» — belgilab berilgan. Kompaniya faqat «kritik» va «yuqori» darajadagi zaifliklarni bartaraf etadi.