Microsoft Skype’ning “klassik” versiyasini qo‘llab-quvvatlashni to‘xtatishini e’lon qildi.

Skype 7 va undan oldingi versiyalarini kompyuter uchun qo’llab-quvvatlash 1-noyabrda tugaydi.

Microsoft Skype’ning “klassik” versiyasini qo‘llab-quvvatlashni to‘xtatayotganini e’lon qildi. Ishlab chiquvchilarning blog postiga ko‘ra, Skype 7 va undan oldingi versiyalarini qo‘llab-quvvatlash 1-noyabrda kompyuterlar uchun, 15-noyabrda esa mobil qurilmalar uchun to‘xtatiladi. Ushbu versiyalar “bir muncha vaqt” ishlashda davom etadi, ammo ishlab chiquvchilar ulanish uzilishlari va boshqa muammolarning oldini olish uchun foydalanuvchilarga dasturiy ta’minotning eng so‘nggi versiyasiga yangilashni qat’iy tavsiya qiladi.

«Skype’ning eski versiyalari qisqa vaqt ichida ishlashi mumkin, ammo xizmatning uzluksiz ishlashini ta’minlash uchun hozir yangilashni tavsiya qilamiz. 7 va undan oldingi versiyalaridan foydalanuvchi foydalanuvchilar faqat hisob va to‘lov muammolari bo‘yicha yordam olishadi», deb ta’kidladi ishlab chiquvchilar.

Skype’ning yangi versiyasi, 8.0, shu yozda chiqarildi. Eski versiyalarni qo‘llab-quvvatlash dastlab 1-sentabrda tugashi rejalashtirilgan edi, ammo keyinchalik Microsoft bu muddatni keyinga qoldirdi.