Microsoft Windows 10 ning 2018-yil oktyabr oyidagi yangilanishini qaytarib oldi.

Foydalanuvchilarning shaxsiy fayllarini o’chirishga sabab bo’lgan xatolik bartaraf etilgandan so’ng, yangilanishlarni tarqatish davom etadi.

Microsoft foydalanuvchilarning shaxsiy fayllari butunlay o’chirilishiga olib kelgan xato haqida ko’plab shikoyatlardan so’ng, Windows 10 2018-yil oktyabr yangilanishining (1809-versiya) tarqatilishini to’xtatdi.

Ishlab chiqaruvchining so’zlariga ko’ra, muammo hal qilingandan so’ng yangilanish versiyasi qayta ishga tushiriladi.

«Biz yangilanishdan keyin fayllarni yo’qotgan individual foydalanuvchilarning xabarlarini tekshirayotgan bir paytda, Windows 10 2018-yil oktyabr yangilanishining (1809-versiya) chiqarilishini to’xtatib qo’ydik. Windows 10 2018-yil oktyabr yangilanishini tarqatishni qayta boshlaganimizda yangilanishni taqdim etamiz», deyiladi kompaniyaning qo’llab-quvvatlash sahifasida.

2018-yil oktabr oyidagi yangilanish to’xtatilgani e’lon qilinganidan ko’p o’tmay, Windows Insider dastur menejeri Dona Sarkar foydalanuvchilar qo’llab-quvvatlash xizmatiga murojaat qilish orqali yangilanish paytida o’chirilgan fayllarni tiklashlari mumkinligini e’lon qildi. Biroq, Microsoft qo’llab-quvvatlash xodimlari bunday vositalardan bexabar edilar. Microsoft bilan bog’langan ko’plab foydalanuvchilarning so’zlariga ko’ra, qo’llab-quvvatlash xodimlari muhandislar hali ham muammoni o’rganayotganliklarini, hech qanday vositalardan bexabar ekanliklarini va ta’sirlangan foydalanuvchilar tahlil tugaguncha kutishlari kerakligini aytishdi.

Bleeping Computer jurnalistlari qiziqarli voqeani payqashdi: Microsoft o’zining Windows 10 qo’llab-quvvatlash sahifasini jimgina yangiladi va ta’sirlangan foydalanuvchilarga kompyuterlaridan foydalanmaslikni tavsiya qiluvchi yangi bo’lim qo’shdi.

«Agar siz yangilanishlarni qo’lda tekshirgan bo’lsangiz va yangilashdan keyin fayllar yo’qolganiga duch kelgan bo’lsangiz, iltimos, ta’sirlangan qurilmadan foydalanishni minimallashtiring va biz bilan bog’laning», deyiladi yangi siyosatda. Ko’rinishidan, kompaniya qandaydir fayllarni tiklash vositasidan foydalanmoqchi.

Avvalroq, 2018-yil oktyabr oyidagi yangilanish foydalanuvchilari yana bir muammo haqida xabar berishgan edi. Xabarlarga ko’ra, yangilanish o’rnatilgandan so’ng, Microsoft Store va Edge’da internetga ulanish bilan bog’liq muammolar paydo bo’ldi. IPv6 o’chirilganda Microsoft Store va Edge ishlashni to’xtatadi. Muammo IPv6 yoqilganda hal bo’ladi.