Microsoft’ning sobiq xodimi ransomware operatori sifatida aniqlandi.

Reveton ransomware operatori sifatida Raymond Uadiale 90 000 dollardan ortiq «ishlagan».

Microsoftning sobiq tarmoq muhandisi fitna va pul yuvishda ayblanib, 18 oylik qamoq jazosiga va uch yillik shartli ozodlik jazosiga hukm qilindi. 41 yoshli Raymond Odigie Uadiale aybini tan olish to’g’risidagi kelishuvni qabul qildi va pul yuvish bo’yicha ikkinchi ayblovni bekor qilish evaziga fitna uyushtirganlikda aybini tan oldi.

Janubiy Florida shtatining Federal okrug sudi Uadialeni Reveton ransomware dasturini tarqatish bo’yicha kiberjinoyatchilik operatsiyasida ishtirok etganlikda aybdor deb topdi. Firibgar Reveton dasturini huquqni muhofaza qilish organlari tomonidan noqonuniy kontent joylashtirilgan veb-saytlarga tashrif buyuruvchilarni kuzatish uchun ishlatiladigan dastur sifatida niqobladi. Jabrlanuvchining kompyuteriga kirgandan so’ng, zararli dastur uni blokladi va jabrlanuvchi «noqonuniy kontent»ni ko’rgani va endi jarima to’lashi kerakligi haqida ogohlantirishni ko’rsatdi.

Uadiale 2012-2013 yillarda Florida xalqaro universitetida talaba bo’lgan paytida firibgarlik sxemasida ishtirok etgan. Sudlanuvchi oldindan to’langan debet kartalari yordamida «jarimalar» uchun to’lovlarni qabul qilgan va keyin mablag’larni o’zi va noma’lum sherik tomonidan boshqariladigan hisoblarga o’tkazish uchun raqamli valyuta Liberty Reserve dan foydalangan. Prokurorlarning so’zlariga ko’ra, Uadiale shu tarzda taxminan 94 000 dollarni yuvib yurgan.

Yetarlicha pul yig’ib olgan firibgar Vashington shtatiga yo’l oldi va Microsoft kompaniyasida tarmoq muhandisi lavozimiga ishga kirdi. Kompaniya hozircha vaziyat bo’yicha izoh bermadi.