Mozilla Firefox 69 da Flash plaginini qo’llab-quvvatlashni to’xtatadi.
Mozilla 2021-yilga kelib Adobe Flash-ni qo’llab-quvvatlashni butunlay to’xtatmoqchi.
2019-yil sentabrida chiqarilishi rejalashtirilgan Firefox 69 ning yangi versiyasida Mozilla ishlab chiquvchilari Adobe Flash plaginini qo’llab-quvvatlashni o’chirib qo’yish niyatida.
2017-yil iyul oyida Adobe 2020-yilda Adobe Flash texnologiyasini qo’llab-quvvatlashni butunlay to’xtatish rejasini e’lon qildi, HTML5, WebAssembly yoki WebGL uning o’rnini bosishi mumkin. Shunga o’xshash rejalar Microsoft, Google, Apple va Mozilla kabi yirik operatsion tizimlar va brauzer ishlab chiqaruvchilari tomonidan ham e’lon qilingan.
Dasturchilar va foydalanuvchilarga Flashning yopilishiga tayyorgarlik ko’rish uchun vaqt berish maqsadida Mozilla NPAPI va Flash plaginlarini qo’llab-quvvatlashni bosqichma-bosqich to’xtatish jadvalini e’lon qildi. NPAPI plaginlari foydalanuvchi kontekstida ishlagani va brauzer tomonidan himoyalanmagani uchun xavfsizlik xavfini tug’diradi. Shu sababli, Google 2013-yilda Chrome’da NPAPI plaginlarini qo’llab-quvvatlashni to’xtatgan edi.
Yo’l xaritasiga ko’ra, Flash plagini 2019-yilda Firefox-da sukut bo’yicha o’chirib qo’yiladi, ammo foydalanuvchilar xohlasalar, uni ayrim veb-saytlarda yoqishi mumkin. 2020-yil boshida Flash qo’llab-quvvatlashi Firefox-ning iste’molchi versiyalaridan butunlay olib tashlanadi. ESR filiallari 2020-yil oxirigacha texnologiyani qo’llab-quvvatlashda davom etadi. 2021-yilda Firefox plaginni yuklashni to’xtatadi.
