NSA xakerlik bo’limining sobiq rahbari kimning xakerlari eng faol ekanligini oshkor qildi.

TAO sobiq rahbarining so’zlariga ko’ra, Rossiya eng faol xakerlarga ega mamlakatlar qatorida.

Dunyo bo’ylab hukumatlar uchun ishlaydigan xakerlar yangilik emas. Biroq, davlatlar zarur bo’lganda maksimal darajada vayronagarchilikka olib kelish uchun hujumkor kiber imkoniyatlarini tez rivojlantirmoqdalar. The Register nashrining xabar berishicha, bu haqda Las-Vegasda bo’lib o’tgan DEFCON konferensiyasidagi nutqida Tailored Access Operations (TAO) sobiq rahbari Rob Joys aytib o’tdi. TAO (AQSh Milliy xavfsizlik agentligining xakerlik bo’limi) sobiq rahbarining so’zlariga ko’ra, boshqa davlatlarga eng ko’p hujum qiladigan davlatlar Rossiya, Xitoy, Eron va Shimoliy Koreyadir. Shunisi e’tiborga loyiqki, Qo’shma Shtatlar bu ro’yxatda yo’q.

Joys ta’kidlaganidek, AQSh rasmiylari hali ham «rus xakerlari»ning AQSh prezidentlik saylovlariga va Buyuk Britaniyaning Yevropa Ittifoqidan chiqishi bo’yicha ovoz berishga aralashuvi ehtimolini tekshirmoqda. Ammo bu ruslarning «hiyla-nayrangi»ning faqat yarmi – ular doimiy ravishda AQShning asosiy tarmoqlariga hujum qilishga harakat qilmoqdalar, deb ta’kidladi Joys.

Xitoyga kelsak, u kamroq hujum qiladi va boshqa maqsadlarni ko’zlaydi. Xitoyliklar AQSh intellektual mulkiga ko’proq qiziqish bildirmoqdalar, ular bu mulkdan o’z iqtisodiyotlarini rivojlantirish uchun foydalanishlari mumkin. So’nggi paytlarda xitoylik xakerlar avvalgidan kamroq hujum qilishmoqda, ammo Joys Xitoy va AQSh o’rtasidagi munosabatlar yomonlashgani sari hujumlar kuchayishi mumkinligini bashorat qilmoqda.

Xitoy singari, Eron ham Qo’shma Shtatlardagi nishonlarga hujumlarini kamaytirdi, ammo Yaqin Sharqdagi tashkilotlarga, xususan, Saudiya Arabistoniga hujum qilishda davom etmoqda.

Dunyodagi iqtisodiy jihatdan eng qoloq davlat bo’lgan Shimoliy Koreya yuqori malakali xakerlar bilan faxrlanadi. KXDR maxsus dasturlar orqali iqtidorli yoshlarni tarbiyalaydi. Shimoliy koreyalik xakerlar asosan pul o’g’irlashga ixtisoslashgan.