Oq uy Amerika kompaniyalariga Huawei va ZTE uskunalarini sotib olishni taqiqlamoqchi.
Taqiq 2019-yil yanvar oyidan boshlab kuchga kirishi mumkin.
AQSh prezidenti Donald Tramp yanvar oyida milliy favqulodda holat e’lon qilishni rejalashtirmoqda, bu esa Amerika kompaniyalarining Xitoyning Huawei va ZTE ishlab chiqaruvchilaridan uskunalar sotib olishiga to’sqinlik qiladi, deb xabar beradi Reuters axborot manbalariga tayanib. Ushbu chora hukumatning Xitoy hukumati josusligi tahdidi tufayli Xitoyning ikkita eng yirik telekommunikatsiya uskunalari ishlab chiqaruvchisini AQSh bozoridan chiqarib tashlashga qaratilgan so’nggi urinishidir.
Agentlik manbalariga ko’ra, taqiq sakkiz oy davomida ko’rib chiqilayotgan Trampning ijro etuvchi farmonida mavjud. Hujjat AQSh Savdo vazirligiga Amerika kompaniyalariga «jiddiy milliy xavfsizlik xavfi» tug’diradigan xorijiy ishlab chiqaruvchilardan uskunalar sotib olishni taqiqlashni buyuradi. Farmonda Huawei yoki ZTE haqida alohida so’z yuritilmagan bo’lsa-da, asosan ushbu ikki kompaniyadan mahsulotlar sotib olish taqiqlanadi. Ularning aytishicha, hujjat matni hali yakunlanmagan.
Huawei va ZTE telekommunikatsiya uskunalarini sotib olishga qo’yilgan taqiq AQShda 5G ning joriy etilishiga ta’sir qilishi mumkin, chunki Amerikaning yirik kompaniyalari hozirda 5G tarmoqlari uchun bazaviy stansiyalarni sotib olish uchun hamkorlar qidirmoqda. Bundan tashqari, taqiq arzon Huawei va ZTE mahsulotlariga tayanadigan va hukumat tomonidan kompensatsiya olmasdan uskunalarni o’z tarmoqlaridan olib tashlashga majbur bo’lishdan qo’rqadigan ko’plab operatorlarga ta’sir qilishi mumkin.
Dekabr oyi boshida Yaponiya hukumati Pekin tomonidan kiberjosuslik xavfi tufayli davlat idoralariga Xitoyning Huawei Technologies va ZTE kompaniyalaridan telekommunikatsiya uskunalarini sotib olishni taqiqladi. Keyinchalik politsiya, birinchi tibbiy yordam va favqulodda xizmatlar uchun yangi aloqa tizimini yaratish loyihasi ustida ishlayotgan Britaniyaning EE mobil operatori ham Huawei uskunalaridan foydalanishni to’xtatishi e’lon qilindi.
