Parvozlarni kuzatish xizmati — Flightradar24 maʼlumotlar sizib chiqishi holatiga duch keldi.

Kompaniya jabrlangan foydalanuvchilar sonini aniq ko‘rsatmadi.

Parvozlarni kuzatish bo‘yicha mashhur xizmat — Flightradar24 kompaniya serverlaridan birida ma’lumotlar sizib chiqishi aniqlanganidan so‘ng, ayrim foydalanuvchilarga o‘z parollarini o‘zgartirishni tavsiya qildi. Ushbu hodisa oqibatida 2016-yil 16-martgacha ro‘yxatdan o‘tgan akkauntlarga tegishli elektron pochta manzillari va parollarning xesh-qiymatlari xavf ostida qolgan bo‘lishi mumkin.

Bildirishnomani olgan ayrim foydalanuvchilar ushbu xatlarni fishing (firibgarlik) urinishlari deb taxmin qilishdi, chunki kompaniya hodisa haqida o‘z veb-sayti yoki ijtimoiy tarmoqlarda hech qanday ma’lumot bermagan edi. Biroq, keyinchalik Flightradar24 vakillari xabarlarning haqiqiyligini tasdiqladilar.

Foydalanuvchilarning shaxsiy maʼlumotlari xavf ostida qolmadi va toʻlov maʼlumotlari Flightradar24 tizimlarida saqlanmaydi, deb taʼkidladi kompaniya vakillari oʻz forumlarida.

Flightradar24 taʼsirga uchragan parollar uchun qaysi xeshlash algoritmi qoʻllanilganiga aniqlik kiritmadi, biroq buzib kirilgan tizim eskirgan boʻlgani hamda unda buzib kirishga zaif boʻlgan eski algoritm ishlatilganini qayd etdi.

Jabrlangan foydalanuvchilarning parollari qayta tiklandi. Kompaniya qancha foydalanuvchi jabrlanganiga aniqlik kiritmadi, biroq Flightradar24 taxminan 40 millionlik foydalanuvchilar bazasiga ega. Ayrim ma’lumotlarga ko’ra, jabrlangan foydalanuvchilar soni 200 000 dan oshishi mumkin.