Putin Rossiyada ijtimoiy tarmoqlarni yopmaslikka va’da berdi.

Davlat rahbari, shuningdek, terrorchilarga qarshi kurashda — jumladan, internetda ham — «erkinlik doirasini cheklamagan holda» zamonaviy vositalardan foydalanish zarurligini ta’kidladi.

Rossiya rasmiylari mamlakatda ijtimoiy tarmoqlarni yopishni rejalashtirmayaptilar. Rossiya Prezidenti Vladimir Putin bu haqda «Rossiya 24» telekanalidagi jonli efirda Instagram va YouTube tarmoqlarining yopilishi ehtimoli haqidagi savolga javob berar ekan, ma’lum qildi. «Biz hech narsani yopishni rejalashtirmayapmiz», — deya ishontirdi Putin. U, shuningdek, Telegram messenjerining Rossiyadagi faoliyati masalasiga ham to‘xtaldi. Davlat rahbari Sankt-Peterburgdagi terrorchilik hujumini — o‘shanda xavfsizlik xizmatlari terrorchilarning ushbu ilova orqali olib borgan yozishmalarini kuzata olmaganini — eslatib o‘tdi va xavfsizlik masalalari ustuvor ahamiyatga ega bo‘lishi kerakligini ta’kidladi.

Vladimir Putin, shuningdek, huquqbuzarliklar va terrorchilarga qarshi kurashda zamonaviy vositalardan foydalanish zarurligini, bunda «jumladan, internetda ham erkinlik maydonini cheklamaslik» lozimligini ta’kidladi.

Eslatib o‘tamiz, joriy yilning 16-aprelida Roskomnadzor Telegram messenjerini bloklashni boshlagan edi; bunga xizmat operatorlarining FSBga foydalanuvchilar yozishmalarini shifrdan chiqarish kalitlarini taqdim etishdan bosh tortgani sabab bo‘lgan. O‘sha kuniyoq regulyator messenjer tomonidan taqiqni chetlab o‘tish uchun foydalanilayotgan Google, Amazon va Microsoft kompaniyalariga tegishli millionlab IP-manzillarni bloklashga kirishdi. May oyi oxirida Roskomnadzor Apple kompaniyasidan Telegram’ni Rossiyada App Store orqali tarqatishni to‘xtatishni talab qilib, aks holda kompaniya xizmatlarini bloklash bilan tahdid qildi.