Qirg‘izistonda Google va Facebook kompaniyalariga soliq solish bo‘yicha taklif ilgari surildi.

Qirg‘izistonlik deputatning hisob-kitoblariga ko‘ra, internet kompaniyalarining soliq to‘lamasligi oqibatida mamlakat 500 million dollardan 1 milliard dollargacha mablag‘ yo‘qotmoqda.

Sputnik Qirg‘iziston xabariga ko‘ra, Qirg‘iziston parlamenti a’zosi Ruslan Kazakbayev Facebook, Instagram, Twitter va Google kabi yirik internet platformalariga soliq joriy etishni taklif qildi.

Kazakbayevning ta’kidlashicha, ushbu internet gigantlari tijorat tashkilotlaridan reklama uchun minglab dollar mablag‘ olsalar-da, reklamalar namoyish etiladigan har bir mamlakatda soliq to‘lash majburiyatiga ega emaslar.

«Mutaxassislarning fikricha, onlayn platformalar soliq to‘lamasligi tufayli biz 500 million dollardan 1 milliard dollargacha mablag‘ yo‘qotmoqdamiz. Deyarli barcha tijorat kompaniyalari reklama uchun ularga pul to‘laydi, biroq ular soliqni faqat o‘z mamlakatlarida to‘laydilar», — deb ta’kidladi deputat.

Misol tariqasida Kazakbayev Rossiya tajribasini keltirdi; u yerda onlayn platformalar 2012-yildan buyon davlatga tegishli to‘lovlarni amalga oshirib kelmoqda. Parlament vakilining so‘zlariga ko‘ra, faqat joriy yilning birinchi choragidayoq internet-kompaniyalar qariyb 2 milliard rubl miqdorida soliq to‘lagan.

Deputat ushbu tashabbusni hayotga tatbiq etish bo‘yicha qonun loyihasini ishlab chiqishga chaqirdi. Shu bilan birga, mazkur o‘zgarishlar foydalanuvchilarga hech qanday tarzda ta’sir ko‘rsatmasligi lozim.