Roskomnadzor shifrlash kalitlarini qo‘lga kiritish maqsadida Telegram kodiga o‘zgartirish kiritishni taklif qildi.

Agentlik maʼlumotiga koʻra, kompaniya buni amalga oshirish uchun texnik imkoniyatga ega.

Bir yil davomida FSB va Roskomnadzor Telegram rahbariyatini messenjer arxitekturasini o‘zgartirishga hamda foydalanuvchilar yozishmalarini shifrdan chiqarish kalitlarini taqdim etishga ko‘ndirishga urinib keldi. Mazkur idoralar kompaniyada buning uchun zarur texnik imkoniyat mavjudligini ta’kidlamoqda. Roskomnadzor vakili bu haqda Telegram’ning Rossiyada xizmat faoliyatini bloklash to‘g‘risidagi Taganskiy tuman sudi qarori ustidan bergan shikoyati ko‘rib chiqilayotgan jarayonda bayonot berdi. «Bir yil davomida FSB va Roskomnadzor Telegram’ni messenjer arxitekturasini o‘zgartirishga undashga harakat qildi. Bizning fikrimizcha, har qanday messenjer tuzilmasini Rossiya qonunchiligiga moslashtirish maqsadida o‘zgartirish mumkin. Shu bois, Telegram’da shifrdan chiqarish kalitlarini taqdim etish uchun texnik imkoniyat mavjud deb hisoblaymiz», — deya regulyator vakilining so‘zlaridan iqtibos keltirdi TASS.

2018-yil aprel oyida Taganskiy tuman sudi Rossiya Federatsiyasi hududida Telegram messenjeriga kirishni cheklash haqida qaror chiqardi; bunga xizmat ko‘rsatuvchi kompaniyaning FSBga (Federal xavfsizlik xizmati) foydalanuvchilar xabarlarini o‘qish imkonini beruvchi shifrlash kalitlarini taqdim etishdan bosh tortgani sabab bo‘ldi. May oyida Telegram vakillari Taganskiy sudi qarori ustidan shikoyat arizasi bilan murojaat qilishdi. 14-iyun kuni Moskva shahar sudi quyi instansiya sudining Rossiyada ushbu ilovaga kirishni cheklash haqidagi qarorini o‘z kuchida qoldirdi.