Roskomnadzor Telegram’ga qarshi kurashni davom ettirish niyatida.

Roskomnadzor Rossiyada ushbu messenjerga kirishni butunlay bloklamaydi, chunki bu texnik jihatdan imkonsizdir.

Roskomnadzor rahbari Aleksandr Jarov xizmatning ayrim funksiyalarini ishdan chiqarish orqali Telegram foydalanuvchilari sonini kamaytirishga qaratilgan yangi texnik yechimlarni taqdim etishga va’da berdi. U bu haqda kp40.ru nashri jurnalistlariga matbuot anjumani chog‘ida ma’lum qildi. Jarovning so‘zlariga ko‘ra, Roskomnadzor Rossiyada messenjerga kirishni to‘liq bloklash niyatida emas — chunki bu texnik jihatdan imkonsiz, — biroq agentlik xizmatning ayrim muhim funksiyalarini ishdan chiqarish imkonini beruvchi vositalarga ega.

«Foydalanuvchilar sonining kamayishiga erishmoqdamiz, chunki xizmatning barcha funksiyalari ham tunu-kun to‘liq ishlamayapti. Bu — asosiy jihat. Biz shu yo‘nalishda davom etishni, ya’ni xizmatning ayrim funksiyalari ish faoliyatini yanada cheklash va foydalanuvchilar bazasini qisqartirishni rejalashtirmoqdamiz […] Yaqin oylarda ushbu yo‘nalishda yanada oldinga siljish imkonini beradigan yangi texnik yechimlarni taklif qilamiz», — deb ta’kidladi Jarov.

Eslatib o‘tamiz, joriy yilning 16-aprelida Roskomnadzor Telegram messenjerini bloklashni boshlagan edi; bunga xizmat operatorlarining FSBga foydalanuvchilar yozishmalarini shifrdan chiqarish kalitlarini taqdim etishdan bosh tortgani sabab bo‘lgan. O‘sha kuniyoq regulyator messenjer tomonidan taqiqni chetlab o‘tish uchun foydalanilayotgan Google, Amazon va Microsoft kompaniyalariga tegishli millionlab IP-manzillarni bloklashga kirishdi. May oyi oxirida Roskomnadzor Apple kompaniyasidan Telegram’ni Rossiyada App Store orqali tarqatishni to‘xtatishni talab qilib, aks holda kompaniya xizmatlarini bloklash bilan tahdid qildi.