Rossiya 2021-yildan boshlab elektron pasportlarga o’tishni rejalashtirmoqda.

Elektron pasportlar joriy etilishi bilan fuqarolarning shaxsiy ma’lumotlarini himoya qilish xarajatlari oshadi.

2021-yildan boshlab Rossiya qog’oz pasportlardan elektron pasportlarga o’tishni boshlaydi. «Vedomosti» nashrining xabar berishicha, ushbu masala bo’yicha yig’ilishlar shu yilning 14 va 17 sentyabr kunlari bo’lib o’tdi, ularga mos ravishda Bosh vazirning raqamli iqtisodiyot bo’yicha o’rinbosari Maksim Akimov va Bosh vazir Dmitriy Medvedev raislik qilishdi. Rossiya hukumati matbuot xizmati «Vedomosti» nashriga tushuntirganidek, elektron pasport fuqarolarga asta-sekin barcha davlat reestrlari va xizmatlaridan foydalanish imkonini beradi. Ushbu xizmatlarni taqdim etish yozuvlari ham elektron shaklda saqlanadi. Elektron pasport, ehtimol, bank kartasiga o’xshash chipli plastik karta bo’ladi.

Elektron pasportda davlat ixtiyorida bo’lgan barcha fuqaro ma’lumotlari bo’ladi. U nafaqat an’anaviy qog’oz pasportni, balki haydovchilik guvohnomasi va shaxsiy sug’urta hisob raqamini (SNILS) ham almashtiradi. Elektron pasportlarga o’tish bilan bir qatorda, fuqarolarning yagona ma’lumotlar bazasi yaratiladi.

Elektron pasportlar va Rossiya fuqarolarining yagona ma’lumotlar bazasini yaratish axborot xavfsizligiga sarflanadigan xarajatlarni oshiradi. Davlat Dumasining Fuqarolik jamiyatini rivojlantirish qo’mitasi rahbari Sergey Gavrilov «Interfaks» agentligiga shaxsiy ma’lumotlar xavfsizligi dasturlarini moliyalashtirish kelgusi yilning o’zidayoq qariyb 3 milliard rublga oshishini aytdi.

Gavrilovning so’zlariga ko’ra, moliyalashtirishning ko’payishi tufayli mutaxassislar «barcha foydalanuvchilar uchun ochiq bo’ladigan va shu bilan birga xavfsizlikni, shu jumladan xakerlik hujumlaridan ham ta’minlaydigan» ishonchli bazani yaratishi mumkin.