Rossiya mobil ilovalar uchun milliy standartni joriy etadi

Davlat tomonidan ishlab chiqilgan standart 2018-yil 1-oktabrdan kuchga kirishi rejalashtirilgan.

Rosstandart mobil ilovalar uchun dastlabki milliy standartni tasdiqladi. Bu haqda 10-iyul, seshanba kuni hujjat nusxasini olgan «Kommersant» jurnalistlari xabar berishdi. Yangi standart mobil ilovalar uchun talablarni belgilovchi 87 ta bandni o’z ichiga oladi. Bularga ishlash, funksionallik, foydalanish qulayligi va xavfsizlik talablari kiradi. Mahalliy ishlab chiquvchilar ilgari Google va Apple kabi yirik xalqaro kompaniyalar tomonidan qabul qilingan standartlarga e’tibor qaratgan bo’lsalar, endi ular milliy standartga amal qilishadi, deb tushuntirdi Roskachestvo rahbari o’rinbosari Ilya Loevskiy.

Hujjatga ko’ra, mobil ilova o’rnatishda «mutlaq minimal ruxsatnomalar»ni so’rashi va ulardan qanday foydalanishni tushuntirishi kerak. Ishlab chiquvchilar, shuningdek, foydalanuvchilarga «aniq talqin qilingan maxfiylik siyosati»ni taqdim etishlari va ularga ilova kirish huquqiga ega bo’lgan shaxsiy ma’lumotlar haqida ma’lumot berishlari shart. Ishlab chiquvchi shuningdek, foydalanuvchilarga ilova tomonidan to’plangan ma’lumotlarning mohiyati, uni uzatish, ishlatish, saqlash va himoya qilish haqida xabar berishi shart. Shuningdek, u to’plangan ma’lumotlarga kim kirish huquqiga ega ekanligini ham ko’rsatishi kerak.

Dasturchi foydalanuvchilarga ma’lumotlarni to’plashdan voz kechish va ularni to’plashni nazorat qilish imkoniyatini berishi kerak. Reklama maqsadida ma’lumotlarni to’plash aniq ko’rsatilishi va reklamaning o’zi ko’zga tashlanmasligi kerak. Rossiya fuqarolarining barcha shaxsiy ma’lumotlari Rossiyada saqlanishi kerak.

Standart pullik dasturiy ta’minot ishlab chiquvchilaridan foydalanuvchilarga bepul sinov versiyalarini taqdim etishni talab qiladi. Bundan tashqari, barcha ilovalarga yiliga kamida bir marta xavfsizlik yangilanishlari berilishi kerak.

Davlat tomonidan ishlab chiqilgan standart 2018-yil 1-oktabrdan kuchga kirishi rejalashtirilgan. U Yevroosiyo iqtisodiy ittifoqiga a’zo davlatlar uchun ham mavjud bo’ladi.