Rossiyadagi internet xizmatlari foydalanuvchi trafikini olti oy davomida saqlashi shart.

Internetda axborot tarqatish tashkilotchilari (ORI) Rossiya Federatsiyasi hududida ma’lumotlarni saqlashlari va vakolatli davlat organlarining so’roviga binoan taqdim etishlari shart.

2018-yil 1-iyuldan boshlab Rossiya hukumatining 28-iyun kuni e’lon qilingan qaroriga binoan, Rossiya internetda axborot tarqatish tashkilotchilari (ORI) o’z foydalanuvchilarining suhbatlari, xabarlari, rasmlari, videolari va boshqa elektron aloqalari yozuvlarini olti oy davomida saqlashlari shart. ORIlar ushbu ma’lumotni Rossiya Federatsiyasi hududida joylashgan serverlarda saqlashlari va tezkor-qidiruv faoliyatini amalga oshiruvchi yoki Rossiya Federatsiyasi xavfsizligini ta’minlovchi vakolatli davlat organlarining so’roviga binoan taqdim etishlari shart.

Eslatib o’tamiz, «Yarovaya qonuni» nomi bilan ham tanilgan terrorizmga qarshi tuzatishlar to’plami 2016-yil iyul oyida qabul qilingan edi. Joriy yilning aprel oyida Rossiya Bosh vaziri Dmitriy Medvedev telekommunikatsiya operatorlari tomonidan Rossiya fuqarolarining matnli va ovozli xabarlarini, shuningdek, uzatilgan tasvirlari, audio va video yozuvlarini saqlash qoidalarini tasdiqladi.

Internetda axborot tarqatish tashkilotchisi – bu Internet foydalanuvchilaridan elektron xabarlarni qabul qilish, uzatish, yetkazib berish va/yoki qayta ishlash uchun mo’ljallangan va/yoki foydalaniladigan axborot tizimlari va/yoki kompyuter dasturlarining ishlashini ta’minlaydigan sub’ekt. Bularga, xususan, xabar almashishni osonlashtiradigan tezkor xabar almashinuvlar, forumlar, ijtimoiy tarmoqlar, tanishuv saytlari va boshqa onlayn platformalar kiradi.