Rossiyalik va xitoylik xakerlar Janubiy Koreyaga hujum qilishdi.

Mutaxassislar hozirda hujumlar oqibatida yetkazilgan zararni baholamoqdalar.

FireEye kompaniyasining kiberxavfsizlik bo‘yicha tadqiqotchilari AQSh va Shimoliy Koreya sammiti arafasida Janubiy Koreyadagi turli tashkilotlarga qaratilgan Rossiya va Xitoy xakerlarining hujumlarini aniqladilar. Bu haqda The Wall Street Journal xabar berdi.

Mutaxassislarning ta’kidlashicha, ushbu hujumlar avvalroq davlat vazirliklari va moliya muassasalari tarmoqlariga noqonuniy kirishda ishtirok etgan guruhlar tomonidan amalga oshirilgan. Ekspertlar hozirda hujumlar keltirib chiqargan zararni baholamoqdalar.

Xususan, ekspertlar asosiy gumonlanuvchilar sifatida quyidagilarni aniqladilar: 2009-yildan beri faoliyat yuritib kelayotgan, Janubiy Koreya va Yaponiya nishonga olinadigan hamda moliya, davlat muassasalari va aerokosmik soha kabi yo‘nalishlarga qilingan hujumlarga ixtisoslashgan Xitoyning «TempTick» xakerlik guruhi hamda Rossiyaning «Turla» kiberjosuslik guruhi.

Tadqiqotchilarning ta’kidlashicha, xakerlik faolligining kuchayishi, katta ehtimol bilan, AQSh Prezidenti Donald Tramp va Shimoliy Koreya yetakchisi Kim Chen In o‘rtasida Singapurda 12-iyunga belgilangan muzokaralar bilan bog‘liq.