«Rus xakeri» Vinnik Rossiya sudi tomonidan sirtdan hibsga olindi.

Sud tomonidan belgilangan ehtiyot chorasi Rossiya rasmiylarining gumonlanuvchini Rossiyaga ekstraditsiya qilish bo‘yicha takroriy so‘roviga asos bo‘lishi mumkin.

Moskvaning Ostankino sudi AQSh rasmiylari tomonidan BTC-E kriptovalyuta birjasi orqali 4 milliard dollardan ortiq mablag‘ni legallashtirishda (yuvishda) gumon qilinayotgan «rossiyalik xaker» Aleksandr Vinnikni sirtdan hibsga olish haqidagi iltimosnomani qanoatlantirdi.

Ushbu qaror 1-iyun kuni qabul qilindi. Vinnikning advokatiga ko‘ra, sud tomonidan belgilangan ehtiyot chorasi Rossiya rasmiylarining uni Rossiyaga qaytarish bo‘yicha takroriy ekstraditsiya so‘roviga asos bo‘lishi mumkin; gap 600 000 rubldan ortiq miqdordagi firibgarlik ayblovlari bo‘yicha ish yuritish uchun uni qaytarish haqida ketmoqda.

Eslatib o‘tamiz, 38 yoshli Rossiya fuqarosi 2017-yilning iyul oyida Gretsiyada hibsga olingan, oktyabr oyida esa Saloniki shahri sudi uni AQShga ekstraditsiya qilish to‘g‘risida qaror chiqargan edi. AQSh rasmiylariga ko‘ra, Vinnik noqonuniy valyuta ayirboshlash va pul yuvish maqsadida foydalanilgan BTC-e kriptovalyuta birjasi asoschilaridan biri hisoblanadi. Ayblanuvchining o‘zi hibsga olinishini AQSh maxsus xizmatlari tomonidan uyushtirilgan operatsiya deb da’vo qilmoqda. Rossiya rasmiylari ham unga nisbatan yengilroq ayblovlar ilgari surgan holda, Vinnikning ekstraditsiya qilinishini talab qilgan edi.

2018-yil may oyida Vinnik Rossiya Federatsiyasi Bosh prokuraturasiga ixtiyoriy ravishda aybiga iqrorlik haqida ariza taqdim etib, boshqalar tomonidan jinoiy yo‘l bilan qo‘lga kiritilgan mablag‘lar va boshqa aktivlarni yirik miqyosda legallashtirishda, shuningdek, BTC-E kriptovalyuta birjasiga bo‘lgan kirish imkoniyatidan foydalangan holda firibgarlik harakatlarini sodir etishda aybini tan oldi. 8-iyun kuni Rossiya Ichki ishlar vazirligi uni xalqaro qidiruvga berdi.