Singapurga qilingan eng yirik kiberhujum ortida xorijiy hukumat turibdi.

Singapur razvedka idoralari hujum ortida kim turganini bilishadi, ammo to’plangan dalillar rasmiy ayblovlarni qo’zg’atish uchun yetarli emas.

Singapur tarixidagi eng yirik kiberhujum xorijiy hukumatning buyrug’i bilan amalga oshirildi. Reuters agentligi Singapur aloqa vaziri S. Isvaranga tayanib xabar berishicha, mutaxassislar Bosh vazirni ham qo’shib hisoblaganda 1,5 million kishining ma’lumotlari o’g’irlanishiga olib kelgan hodisa «davlat homiyligidagi» xakerlarning ishi ekanligiga oid dalillarni topdilar. Singapur rasmiylari bu buzg’unchilik haqida shu yilning 20 iyulida xabar berishgan, garchi hodisaning o’zi iyun oyi oxirida sodir bo’lgan bo’lsa ham. Hujum paytida hujumchilar so’nggi uch yil ichida Singapur kasalxonalarida ambulatoriya bemorlariga buyurilgan shaxsiy ma’lumotlar va dori-darmon yozuvlarini o’g’irlashgan.

Aloqa vaziri xavfsizlik nuqtai nazaridan kiberhujum manbasini aniqlashdan bosh tortdi. Biroq, S. Isvaran bu «Advanced Persistent Threat» (APT) guruhi tomonidan amalga oshirilganini va bunday guruhlar odatda hukumat bilan bog’liqligini ta’kidladi. Vazirning so’zlariga ko’ra, Singapur razvedka idoralari hujum ortida kim turganidan xabardor, ammo to’plangan dalillar rasmiy ayblovlar qo’zg’atish uchun yetarli emas.

Singapur sog’liqni saqlash vaziri Gan Kim Yong ta’kidlaganidek, hujumchilar tergovga xalaqit berish uchun izlarini yashirishga urinishgan va hujumni takrorlashlari mumkin edi.