Tadqiqotchi parvoz vaqtidagi havo kemalarining tizimlariga masofadan turib buzib kirdi.

Mutaxassis bortdagi Wi-Fi tarmoqlariga, jumladan, yo‘lovchilarning qurilmalariga ulanishga muvaffaq bo‘ldi.

IO Active kompaniyasi xavfsizlik bo‘yicha tadqiqotchisi Ruben Santamarta parvoz qilayotgan samolyotning Wi-Fi tarmoqlari va sun’iy yo‘ldosh aloqa uskunalarini yerdan turib muvaffaqiyatli buzib kirdi. Bu haqda Dark Reading xabar berdi.

Mutaxassis bortdagi Wi-Fi tarmoqlariga (shu jumladan, yo‘lovchilarning qurilmalariga) ulanishga hamda samolyotdagi muhim sun’iy yo‘ldosh va aloqa tizimlariga kirish huquqini qo‘lga kiritishga muvaffaq bo‘ldi.

Tadqiqotchi 2018-yilning 4–9-avgust kunlari Las-Vegasda (AQSh) bo‘lib o‘tadigan «Black Hat» konferensiyasida samolyotlar hamda bortdagi sun’iy yo‘ldosh aloqa tizimlariga aynan qanday yo‘l bilan kirishga muvaffaq bo‘lganini namoyish etishni rejalashtirmoqda. Santamarta sun’iy yo‘ldosh aloqa uskunalaridan qurol sifatida foydalanish va natijada ular samolyotlar xavfsizligiga qanday tahdid solishi mumkinligini tushuntirib berishni maqsad qilgan.

Mutaxassisning so‘zlariga ko‘ra, u shunga o‘xshash usullardan foydalangan holda mojaroli hududlardagi NATOning bir qancha harbiy obyektlari joylashuvini aniqlagan, shuningdek, dengiz kemalaridagi tarmoqlarga ham kirishga muvaffaq bo‘lgan.

Santamarta avvalroq Panasonic Avionics multimedia tizimida — Air France va American Airlines kabi 13 ta yirik aviakompaniya samolyotlarida qo‘llaniladigan tizimda — xakerlarga samolyotni masofadan turib egallab olish imkonini beruvchi zaiflikni aniqlagan edi.