Twitter’dagi xatolik to‘rt yildan ortiq vaqt davomida Android foydalanuvchilarining shaxsiy xabarlarini fosh qilib kelmoqda.
Zaiflik natijasida «Tvitlaringizni himoya qiling» sozlamasi o’chirib qo’yildi va barcha himoyalangan xabarlar ko’rsatildi.
Twitter Android foydalanuvchilarining shaxsiy xabarlarini to’rt yildan ortiq vaqt davomida ommaga ochiq bo’lishiga imkon beruvchi zaiflikni tan oldi. Twitterga ro’yxatdan o’tishda barcha tvitlar sukut bo’yicha ommaviydir; foydalanuvchilar o’z xabarlarini himoya qilish uchun «Tvitlaringizni himoya qiling» opsiyasini yoqishni tanlashlari mumkin. Twitter vakillarining so’zlariga ko’ra, 2014-yil 3-noyabrdan beri mavjud bo’lgan zaiflik foydalanuvchining xabarisiz «Tvitlaringizni himoya qiling» sozlamasining o’chirib qo’yilishiga olib keldi, natijada barcha himoyalangan xabarlar ommaga ochiq bo’lib qoldi. Muammo faqat 2014-yil 3-noyabrdan 2019-yil 14-yanvargacha elektron pochta manzili yoki mobil telefon raqamini o’zgartirgan Android Twitter foydalanuvchilariga ta’sir qiladi. Zaiflik ilovaning iOS va ish stoli versiyalari foydalanuvchilariga ta’sir qilmaydi.
Kompaniya xato qanday aniqlangani yoki qancha foydalanuvchi zarar ko’rganligi haqida ma’lumot bermadi. Ko’pgina foydalanuvchilar so’nggi to’rt yil ichida kamida bir marta o’z hisob sozlamalarini o’zgartirganliklarini hisobga olsak, bu juda ko’p odamlarga ta’sir qilgan bo’lishi mumkin. Ijtimoiy tarmoq ma’muriyatining ma’lumotlariga ko’ra, zaiflik shu yilning 14-yanvarida tuzatilgan.
O’tgan yilning dekabr oyida xavfsizlik bo’yicha tadqiqotchilar Twitterda uchta zaiflik haqida xabar berishdi. Ulardan biri xakerlarga jabrlanuvchining telefon raqamidan foydalanib Twitter akkauntini buzishga imkon bergan, ikkinchisi foydalanuvchilarning shaxsiy xabarlariga kirish imkonini bergan va uchinchisi akkaunt bilan bog’liq mobil telefon raqamini fosh qilgan.
