Ukrainalik ruhoniy Qo’shma Shtatlarda kiberjinoyatchilik guruhida ishtirok etganlikda aybdor deb topildi.

Morgan Stanley kompaniyasining sobiq vitse-prezidenti Vitaliy Korchevskiy xakerlar tomonidan o’g’irlangan ichki ma’lumotlar asosida aksiyalar savdosi bilan shug’ullangan.

Morgan Stanley kompaniyasining sobiq vitse-prezidenti, hozirda cherkov ruhoniysi va ukrain millatiga mansub Pensilvaniya shtatida yashovchi Vitaliy Korchevskiy xalqaro kiberjinoyatchilik guruhida ishtirok etganlikda aybdor deb topildi. Sud hujjatlariga ko’ra, Korchevskiy 2011 va 2015 yillar oralig’ida ichki savdodan taxminan 14 million dollar «ishlagan». Firibgar ukrain xakerlaridan olingan maxfiy ma’lumotlar asosida qimmatli qog’ozlar bilan operatsiyalarni amalga oshirgan. Kiberjinoyatchilar Korchevskiyga kompaniya daromadlari to’g’risidagi hisobotlar, boshqaruv bayonotlari va boshqa ma’lumotlarni nashr etilishidan oldin taqdim etishgan, deb xabar beradi Bloomberg.

Vitaliy Korchevskiy va uning sherigi Vladislav Xalupskiy barcha ayblovlar bo’yicha, jumladan, elektron pochta orqali firibgarlik qilish, kompyuter ma’lumotlarini buzish va pul yuvishda aybdor deb topildi.

Tergovchilarning so’zlariga ko’ra, kompaniyalar yangiliklar tizimiga press-relizlarni yuklagan va ularni nashr etgan vaqt oralig’ida Korchevskiy yuzlab qimmatli qog’ozlar sotib olish va sotish operatsiyalarini amalga oshirgan.

Korchevskiyning sherigi Vladislav Xalupskiyning aybini isbotlash uchun prokuror sudlanuvchining o’ziga yuborgan elektron pochta xabarini ilova sifatida keltirdi, unda nashr etilmagan press-reliz mavjud edi. Xalupskiy 2016-yilda aybini tan olgan ukrainalik xakerlar Arkadiy va Igor Dubovixdan ma’lumot olgan.

Korchevskiy Ukraina va Qo’shma Shtatlardan kelgan o’nta shaxs, xakerlar va savdogarlarni o’z ichiga olgan firibgarlik sxemasining markaziy firibgari edi. Firibgarlar Panera Bread, Caterpillar, Home Depot va Advanced Micro Devices kabi kompaniyalarning ma’lumotlaridan foydalanib millionlab pul ishlashgan.