Ukrainalik xaker butun dunyo bo‘ylab foydalanuvchilarning kompyuterlarida kriptovalyuta mayningi bilan shug‘ullangan.

Politsiya huquqbuzarning kompyuterida taxminan 70 ta zararli faylni aniqladi.

Ukrainaning Mariupol shahrida Donetsk viloyati kiberpolitsiyasi xodimlari 2017-yil kuzidan buyon kriptovalyuta mayningi (ishlab chiqarish) uchun mo‘ljallangan zararli dasturlarni tarqatib kelgan 32 yoshli xakerni qo‘lga oldi. Bu haqda Donetsk viloyati Milliy politsiya bosh boshqarmasi matbuot xizmati xabar berdi. Huquqni muhofaza qilish organlari ma’lumotlariga ko‘ra, huquqbuzar virtual valyuta mayningi uchun mo‘ljallangan dasturni o‘zgartirib, uni internet orqali tarqatgan. Kiberjinoyatchi mayning jarayonlari uchun jabrlanuvchilarning kompyuterlari hisoblash quvvatidan foydalangan. U qo‘lga kiritilgan kriptovalyutani grivnaga aylantirgan va keyinchalik mablag‘ni o‘zining bank hisob raqamiga o‘tkazgan.

Politsiya gumonlanuvchini qo‘lga olish operatsiyasini tayyorlashga bir necha oy sarflab, uning noqonuniy faoliyatini sinchkovlik bilan hujjatlashtirdi. Mariupol shahrida yashovchi ushbu shaxsning uyida o‘tkazilgan tintuv davomida tarkibida taxminan 70 ta zararli fayl bo‘lgan kompyuter musodara qilindi.

Huquqbuzarning harakatlari Ukraina Jinoyat kodeksining 361-moddasi («Elektron hisoblash mashinalari, avtomatlashtirilgan tizimlar, kompyuter tarmoqlari yoki telekommunikatsiya tarmoqlari ishiga ruxsatsiz aralashish») va 361-1-moddasi («Zararli dasturiy yoki apparat vositalarini foydalanish, tarqatish yoki sotish maqsadida yaratish, shuningdek, ularni tarqatish yoki sotish») bo‘yicha malakalangan.