Vikipediya Yevropa Ittifoqi direktivasiga qarshi norozilik sifatida ish tashlash e’lon qildi.

Veb-saytning italyan, ispan, latish, eston va polyak tillaridagi versiyalari faoliyatini vaqtincha to’xtatdi.

Vikipediya onlayn ensiklopediyasining bir nechta Yevropa versiyalari Yevropa Ittifoqining onlayn mualliflik huquqini himoya qilish bo’yicha direktivasiga qarshi norozilik sifatida faoliyatini vaqtincha to’xtatdi. Veb-saytning italyan, ispan, latish, eston va polyak tillaridagi versiyalarida agar direktiva qabul qilinsa, onlayn ma’lumot almashishga to’sqinlik qilinishi va Vikipediyaning o’zi yopilish xavfi ostida qolishi haqida yozilgan banner namoyish etilmoqda. Rus tilidagi ensiklopediya forumi hozirda hamkasblarini qanday qo’llab-quvvatlashni muhokama qilmoqda. Nemis, fransuz va ingliz tillaridagi Vikipediya o’zgarishsiz ishlamoqda.

Yevropa Parlamenti 5-iyul, payshanba kuni mualliflik huquqini himoya qilishni kuchaytiruvchi va onlayn axborot oqimiga qo’yiladigan talablarni kuchaytiruvchi direktivani ko’rib chiqadi. O’zgarishlarga qarshi bo’lganlar, ayniqsa, ikkita qoidadan xavotirda: onlayn platformalardan mualliflarga ularning kontenti havola qilinganida pul to’lashni talab qiluvchi 11-modda va platformalarni foydalanuvchilari tomonidan mualliflik huquqini buzganlik uchun javobgarlikka tortadigan 13-modda.