Xakerlar Hindiston bankidan 3 kun ichida 13,5 million dollar o’g’irlashdi.

Hozircha hujumlar ortida kim turgani aniq emas.

Hindistonning ikkinchi yirik kooperativ banki bo’lgan Cosmos Bank vakillari kreditor serverlari buzib kirilganini e’lon qilishdi. Reuters agentligining xabar berishicha, uch kun ichida xakerlar 940 million rupiydan (13,5 million dollar) ortiq mablag’ni o’g’irlashga muvaffaq bo’lishdi. Hozirda hodisa bo’yicha tergov davom etmoqda. Bank ma’lumotlariga ko’ra, 2018-yil 11-avgustdagi hujumning birinchi bosqichida xakerlar 28 mamlakatdagi 14 849 ta bankomatdan 805 million rupiy (11,4 million dollar) yechib olishgan. Yirik tranzaksiyalar asosan chet elda amalga oshirilgan.

Bank vakillari shubhali tranzaksiyalarni aniqlaganliklarini va aralashishga uringanliklarini aytishdi, ammo xakerlar bank tarmog’ida qolishdi va 13-avgust kuni ikkinchi hujumni boshladilar. SWIFT bank tizimidan foydalanib, hujumchilar yana 139 million rupiy (2 million dollar) ni Gonkong bank hisob raqamiga o’tkazdilar.

Bank vakillari kredit muassasasi barcha zararlarni xalqaro bank standartlariga muvofiq qoplashini ta’kidladilar. Bayonotga ko’ra, xakerlar bank tarmog’ini buzish uchun «proksi-kommutator» deb nomlangan narsadan foydalanganlar.

Mavjud ma’lumotlarga ko’ra, hujum Kanadada boshlangan, ammo bu shunchaki hujumchilarning haqiqiy joylashuvini yashirish uchun ishlatilgan ma’lumot uzatish nuqtalari bo’lgan bo’lishi mumkin. Hozirda hujumlar ortida kim turgani noma’lum.