Xakerlar ransomware’dan ko‘ra kriptovalyuta qazib olishni afzal ko‘rishadi

So’nggi paytlarda ransomware’dan zarar ko’rgan foydalanuvchilar ulushi sezilarli darajada kamaydi.

Kaspersky Lab xavfsizlik tadqiqotchilari 2016-yildan 2018-yilgacha ransomware va kriptovalyuta maynerlaridan foydalanish bo’yicha hisobotni e’lon qilishdi. Tadqiqotchilarning fikriga ko’ra, tajovuzkorlar tobora ko’proq ransomware o’rniga kriptovalyuta qazib olish dasturidan foydalanishni tanlamoqdalar. Hisobotga ko’ra, ransomware’dan zarar ko’rgan foydalanuvchilar ulushi so’nggi paytlarda sezilarli darajada kamaydi. Shu bilan birga, noqonuniy kriptovalyuta qazib olish qurbonlari soni ham oshdi.

«Kibertahdidlar manzarasidagi bu o’zgarishlarning sabablari juda aniq. Hujumchilar uchun ransomware pul ishlashning ancha xavfli usuli hisoblanadi, chunki ushbu zararli dasturdan foydalangan holda hujumlar keng ommaviy axborot vositalari va hukumat e’tiborini tortadi. Boshqa tomondan, kriptomaynerlarni faollashtirish osonroq va ular barqarorroq daromad modelini taklif qilishadi», deb ta’kidladi mutaxassislar.

Hisobotga ko’ra, so’nggi 12 oy ichida noqonuniy qazib olish qurboniga aylangan foydalanuvchilar soni 44 foizga o’sib, 1,9 milliondan 2,7 milliongacha yetdi. Mobil qurilmalarni maynerlar tomonidan yuqtirish holatlari soni ham 9 foizga o’sib, taxminan 5000 taga yetdi.

Shu bilan birga, mobil qurilmalarda ransomware bilan duch kelgan foydalanuvchilar soni 22 foizga kamayib, 101 000 tani tashkil etdi, kompyuterlarda ransomware bilan bog’liq kiberhujumlar soni esa deyarli uchdan bir qismga kamayib, 1,8 millionga yetdi.