Xakerlar Xitoydagi internet-kafelarda 100 000 dan ortiq kompyuterga buzib kirdi.

Hujumchilar buzib kirilgan tizimlar yordamida 800 000 dollarlik kriptovalyuta ishlab topdilar.

Bir guruh xakerlar Siacoin kriptovalyutasini mayning qilish (ishlab chiqarish) maqsadida Xitoyning 30 ta shahridagi internet-kafelarda 100 000 dan ortiq kompyuterga noqonuniy kirishga muvaffaq bo‘ldilar. Ushbu sxema orqali hujumchilar 5 million yuan (taxminan 800 000 dollar) daromad ko‘rdilar. Xitoy OAV xabarlariga ko‘ra, guruh mahalliy kompyuterlarga texnik xizmat ko‘rsatuvchi kompaniyalar bilan til biriktirgan; ushbu firmalar texniklari jihozlarni muntazam tekshirish jarayonida internet-kafe kompyuterlariga hujumchilarning mayning dasturiy ta’minotini o‘rnatib berishgan. Mayning va kriptovalyutani sotishdan tushgan daromad xakerlar hamda ularning sheriklari o‘rtasida taqsimlangan.

Muammo ilk bor 2017-yilning iyul oyida, Rui’an shahridagi bir nechta internet-kafe menejerlari o‘z kompyuterlari unumdorligi sezilarli darajada pasayganini payqaganlarida ma’lum bo‘ldi; hatto qayta ishga tushirilgandan keyin ham protsessor yuklamasi ko‘pincha 70 foizga yetardi. Shu bilan birga, ushbu muammoga duch kelgan muassasalarda elektr energiyasi uchun to‘lovlar keskin oshib ketdi. Vaziyatda shubhali holat borligini sezgan internet-kafe egalari huquqni muhofaza qilish organlariga murojaat qilishdi.

2018-yil iyun oyida Xitoy huquqni muhofaza qilish organlari ushbu sxemaga aloqadorlikda gumon qilingan 16 kishini hibsga oldi.