Xitoylik kiber-josuslar Osiyodagi maʼlumotlar markaziga hujum qilishdi.

Hujumda HyperBro zararli dasturidan foydalanilgan.

Xitoy hukumati bilan aloqador deb hisoblanadigan LuckyMouse xakerlik guruhi Markaziy Osiyodagi davlat maʼlumotlar markaziga hujum qildi. Kaspersky tadqiqotchilarining fikricha, xakerlarning asosiy maqsadi — mamlakat hukumat veb-saytlariga qarshi kiberhujumlar uyushtirish uchun qulay pozitsiyani egallashdir. LuckyMouse, Emissary Panda, APT27 va Threat Group 3390 nomlari bilan tanilgan ushbu guruh kamida 2010-yildan beri faoliyat yuritib kelmoqda va butun dunyo bo‘ylab yuzlab tashkilotlarga, jumladan, AQSh mudofaa sanoati pudratchilari, moliya firmalari, Yevropadagi dron ishlab chiqaruvchi kompaniya va AQSh energetika boshqaruvi kompaniyasiga qilingan hujumlarga aloqador deb ko‘riladi.

«Kaspersky Lab» tadqiqotchilari ushbu guruh tomonidan 2018-yilning mart oyida amalga oshirilgan yangi hujumni aniqladilar. Hujum nishoni Markaziy Osiyodagi nomi oshkor etilmagan mamlakatda joylashgan hukumat maʼlumotlar markazi bo‘lgan.

Tadqiqotchilar maʼlumotlar markaziga aynan qanday yoʻl bilan kirib olinganini aniqlay olmadilar; biroq, bir taxminga koʻra, xakerlar tashkilot xodimlarining akkauntlarini buzib kirgan yoki Microsoft Office hujjatlariga joylashtirilgan zararli dasturiy taʼminotdan foydalangan boʻlishi mumkin.

Hujumda HyperBro zararli dasturi qo‘llanilgan. Mutaxassislar tomonidan tahlil qilingan namunalar 2017-yilning dekabridan 2018-yilning yanvarigacha bo‘lgan davrga oid vaqt belgilariga ega edi.

Ushbu kampaniyada foydalanilgan asosiy boshqaruv va nazorat (C&C) serveri Ukraina internet-provayderiga tegishli IP-manzilga ega edi. Aniqrog‘i, ushbu IP-manzil 2016-yil mart oyida chiqarilgan proshivka (dasturiy ta’minot) versiyasi o‘rnatilgan MikroTik routeriga bog‘langan.