Xitoylik xakerlar AQSh harbiy-havo kuchlaridan 614 Gb maxfiy maʼlumotlarni oʻgʻirlab ketishdi

O‘g‘irlangan ma’lumotlar tovushdan tez uchuvchi kemalarga qarshi raketalarni yaratishga oid tafsilotlarni o‘z ichiga olgan edi.

Xitoy hukumati manfaatlarini ko‘zlab harakat qiluvchi xakerlar AQSh Harbiy-dengiz kuchlari pudratchisining kompyuter tarmog‘iga kirib, suv osti urushiga oid maxfiy ma’lumotlarni o‘g‘irladilar. Xususan, o‘g‘irlangan ma’lumotlar orasida 2020-yildan keyin AQSh suv osti kemalarini jihozlash uchun mo‘ljallangan tovushdan tez uchuvchi kemaga qarshi raketalarni ishlab chiqishga oid tafsilotlar ham bor edi. The Washington Post nashri xabariga ko‘ra, xakerlar jami 614 gigabayt hajmdagi ma’lumotni, jumladan, maxfiy «Sea Dragon» (Dengiz ajdahosi) loyihasi, shuningdek, suv osti kemalari datchiklari va kriptografik tizimlariga oid ma’lumotlarni qo‘lga kiritganlar. AQSh Harbiy-dengiz kuchlari pudratchisi ushbu ma’lumotlarni himoyalanmagan serverda saqlagan. 2018-yilning yanvar va fevral oylarida aniqlangan ushbu kiberhujumlar yuzasidan hozirda tergov harakatlari olib borilmoqda.

Avval xabar qilinganidek, xitoylik xakerlar Rossiya davlat idoralari va harbiy-sanoat sektoriga qarshi hujumlarni kuchaytirdilar. Mutaxassislarning fikricha, xakerlar o‘z e’tiborlarini AQShdan Rossiyaga qaratdilar, chunki bu mamlakat kiberjosuslik agentlari uchun qiziqish uyg‘otadigan ko‘plab yirik korxonalarga ega.