Yaponiya kiberxavfsizlik vaziri texnik jihatdan savodsiz ekanligi aniqlandi.

Rasmiy hech qachon kompyuterdan foydalanmaganligini tan oldi.

Parlament quyi palatasida bo’lib o’tgan munozarada Yaponiya kiberxavfsizlik vaziri Yoshitaka Sakurada shaxsiy kompyuterdan qanday foydalanishni bilmasligini tan oldi. Muxolifat qonun chiqaruvchilarining savollariga javoban vazir qurilmalarga ehtiyoji yo’qligini va agar kompyuterdan foydalanish kerak bo’lsa, uni kotibalari va xodimlari boshqarishini aytdi, deb xabar beradi The New York Times. Axborot xavfsizligi bo’yicha mutaxassislar bir necha bor xavfsizlikka tahdid sifatida aniqlagan atom elektr stansiyalarida USB disklardan foydalanish haqidagi savollarga javob berar ekan, Sakurada noaniqlik bildirdi. «Men bu mavzu tafsilotlarini bilmayman», deb tan oldi u savolni boshqa mutaxassislarga yo’naltirib.

Vazirning tan olishi ko’plab parlament a’zolarini hayratda qoldirdi.

«Kiberxavfsizlik uchun mas’ul shaxs hech qachon kompyuterdan foydalanmaganiga ishonolmayman», dedi muxolifat yetakchisi Masato Imai.

Yoshitaka Sakurada nafaqat kiberxavfsizlik masalalari, balki 2020-yilda Tokioda bo’lib o’tadigan Yozgi Olimpiada o’yinlariga tayyorgarlik uchun ham mas’uldir. Biroq, hatto bu yerda ham vazir jurnalistlarning savollariga javob berayotganda «tadbirning asosiy jihatlarini juda yaxshi tushunmasligini» namoyish etib, o’zini qobiliyatsiz deb ko’rsatdi. Rasmiyning o’zi bu vazifani uddalay olishiga ishonadi.

Sakurada o’tgan oyda Bosh vazir Shinzo Abe Yaponiya hukmron Liberal-demokratik partiyasi rahbari etib qayta saylanganidan so’ng lavozimga kirishdi. Endi muxolifat uning iste’fosini talab qilmoqchi.