Yaponiya rasmiylari Huawei va ZTE uskunalaridan foydalanishni taqiqlamoqchi.

Hatto yapon kompaniyalarining uskunalari ham Huawei va ZTE komponentlaridan foydalansa, taqiq ostida qolishi mumkin.

2018-yil 10-dekabrdan boshlab Yaponiya hukumati Pekin tomonidan kiberjosuslik xavfi tufayli davlat idoralariga Xitoyning Huawei Technologies va ZTE kompaniyalaridan telekommunikatsiya uskunalarini sotib olishni taqiqlashi mumkin. Yomiuri Shimbun gazetasining xabar berishicha, taqiq hatto Huawei yoki ZTE komponentlarini o’z ichiga olgan yapon kompaniyalarining uskunalariga ham qo’llanilishi mumkin. Reuters manbalari ham bu ma’lumotni tasdiqladilar. Ularning so’zlariga ko’ra, hukumat qarorida kompaniyalarning nomlari aytilmaydi, ammo xavfsizlik choralari asosan Huawei va ZTEga qaratilgan bo’ladi. Manbalardan biri ta’kidlaganidek, hukumat xavf tug’dirsa, uskunalarni sotib olishni to’xtatishi mumkin, ammo xususiy kompaniyalar tomonidan sotib olishni cheklash ancha qiyinroq. Huawei hozirda ikkita xususiy yapon telekommunikatsiya kompaniyasi – NTT Docomo va KDDI Corp.ga tarmoq uskunalarini yetkazib beradi. NTT Docomo vakillari Reutersning izoh berish haqidagi iltimosiga javob berishdan bosh tortdilar, KDDI esa har qanday o’zgarishlarni diqqat bilan kuzatib borayotganini va tegishli choralarni ko’rib chiqishini ma’lum qildi.

Yaponiya Vazirlar Mahkamasi Bosh kotibi Yoshihide Suga vaziyat haqida izoh berishdan bosh tortdi, ammo uning mamlakati kiberxavfsizlik kabi ko’plab sohalarda Qo’shma Shtatlar bilan yaqin aloqada ekanligini ta’kidladi.

«Yaponiyada kiberxavfsizlik tobora muhim ahamiyat kasb etmoqda. Biz uni turli nuqtai nazardan baholagandan so’ng qat’iy choralar ko’ramiz», dedi Suga.

Agar Yaponiya xaridlarni cheklashga qaror qilsa, u Xitoy kompaniyalaridan uzoqlashadigan mamlakatlar ro’yxatiga qo’shiladi. Xususan, shu yilning avgust oyida Avstraliya hukumati mamlakatning 5G tarmog’ida Huawei va ZTE uskunalaridan foydalanishni taqiqladi. Noyabr oyi oxirida Yangi Zelandiya rasmiylari shunga o’xshash qaror qabul qilishdi. Belgiya hukumati ham Huawei uskunalaridan foydalanishni taqiqlashni ko’rib chiqmoqda.